Қазақстанның көлік-логистикалық әлеуетін арттыру және жол инфрақұрылымын жаңғырту бағытында елімізде «Бақты – Аягөз» теміржолы мен «Арал – Каспий» тас жолы сынды ірі жобалар қарқынды жүзеге асырылуда, – деп хабарлайды 7-su.kz ақпарттық порталы.
Мемлекет басшысы Жолдауында көлік-логистика саласын дамытуды стратегиялық маңызы бар басты міндет ретінде айқындап берген еді. Қазіргі таңда осы тапсырма аясында ел аумағында жаңа теміржол желілері мен халықаралық маңызы бар автожолдардың құрылысы қызу жүріп жатыр. Аталған бастамалар Еуразия кеңістігіндегі негізгі транзиттік хабқа айналу жолындағы маңызды қадам саналады.
Сала мамандарының айтуынша, көлік дәліздерін кеңейту – жай ғана жаңа жол салу емес, ол – ел экономикасының күре тамырына қан жүгірту. Қарапайым тілмен айтқанда, «транзиттік әлеует» дегеніміз – өзге мемлекеттердің тауарларын өз аумағымыз арқылы жылдам әрі қауіпсіз өткізіп, сол қызметтен табыс табу мүмкіндігі. Географиялық орналасуы жағынан Қазақстан Шығыс пен Батысты, Солтүстік пен Оңтүстікті байланыстыратын алтын көпір іспетті. Осы артықшылықты тиімді пайдалану үшін инфрақұрылымды заман талабына сай жаңарту аса қажет.
Осы орайда ерекше атап өтетін жобаның бірі – «Бақты – Аягөз» бағытындағы теміржол желісі. Алдағы жылы пайдалануға берілетін жаңа магистраль еліміздің шығыс қақпасындағы жүктемені айтарлықтай жеңілдетеді. Атап айтқанда, көршілес Қытай Халық Республикасымен арадағы жүк өткізу мүмкіндігі 20 млн тоннаға дейін ұлғаяды. Сонымен қатар елімізде үшінші халықаралық теміржол өткелі ашылып, тауар айналымының қарқыны 2-3 есеге жеделдейді. Осындай ауқымды жұмыстар Жетісу өңірі мен Абай облысының әлеуметтік-экономикалық дамуына да оң әсерін тигізіп, жаңа жұмыс орындарының ашылуына жол ашады.
Екінші маңызды бастама – «Арал – Каспий» күре жолының құрылысы. Жаңа автодәліз еліміздің орталық және батыс аймақтары арасындағы қатынасты түбегейлі өзгертеді. Жоба толық аяқталған кезде жүк тасымалдау қашықтығы шамамен 1000 шақырымға қысқарады. Логистика тілімен түсіндірсек, жолдың қысқаруы – тасымалдау уақытының азаюы, жанар-жағармай шығынының төмендеуі және түптеп келгенде, дүкен сөрелеріндегі тауар бағасының тұрақтануына тікелей ықпал ететін фактор.
