– Бақтияр Мырзаханұлы, ең алдымен өзіңізді төл мерекеміз – Баспасөз күнімен құттықтап, отбасыңызға амандық, шығармашылық табыстар тілеймін. Осы мерейлі мерекеге республикаға жол тартқан жаңа басылым – «Рухани жаңғыру» журналы қандай жетістіктермен жетіп отыр?
– Рахмет, өзіңізді де және барша әріптестерімізді төл мерекемізбен құттықтаймын. Ғасыр жасаған газеттеріңіздің мерейтойы құтты болсын! Журналымыз күні кеше ғана жарыққа шықса да оқырман ықыласына бөленіп отыр. Еліміздің түкпір-түкпірінен редакция қоржынына сансыз хаттар мен мақалалар лек-легімен түсуде. Осы тұрғыда ақпараттық қолдау көрсеткен «Егемен Қазақстан», «Айқын», «Қазақ әдебиеті», «Қала мен дала», «Рух», 100 жылдық тарихы бар «Жетісу» сынды ақпарат айдынындағы және барлық ақпарат құралдарындағы әріптестеріме алғысым шексіз. Әр басылымның оқырманы бөлек. Ол рас! Еліміз бойынша ЖОО доктор, профессор, ғалым аға-әпкелеріміз осы басылымдардан журналдың қанат серпігенін естіп, құлағдар болып, қол ұшын созуда. Осының өзі біз үшін алғашқы жетістіктердің бірі деп білеміз. Осы тұрғыда республикалық «Рухани жаңғыру» журналы Астана, Алматы емес, Алматы облысында жарық көруінің өзі сәттілік деп санаймын.
– Басылымның басты ұстанымы, мақсат-мазмұны жайында кеңірек тарқатып өтсеңіз?
– Елбасының бағдарламалық мақаласында көрсетілген басым бағыттар – біздің жаңа басылымымыздың негізгі айдарларына айналып отыр. «Рухани жаңғыру» журналы оқырманына қазақ ұлтының жаңғыру жолына түсудегі негізгі жетістіктері мен жеңістерін паш етуді, осы жолда өнегесі мен еңбегі үлгі болған жандардың ұстанымдарын жариялайды. Көне замандағы көрікті қалаларымыз, ежелгі дүние сипатын, сән-салтанаты жарасқан озық ескерткіштеріміз, мәдени мұраларымыз жайлы да осы басылым бетінен оқи аласыз. Әдебиеттің, мәдениеттің, өнер жайлы да пайымды-пайдалы материалдар оқырмандардың көкірек көздеріне сәуле болып құйыларына бек сенімдімін. Қоғамның даму кілті – білімде. Болашақ қоғам мүшелеріне тәрбие беруді жүзеге асыратын мамандар даярлайтын біздің білім беру ұйымдарының да жетістіктерімен журнал арқылы таныс болады деп үміттенеміз. Әрбір жас өз жері мен оның байлығының иесі болу үшін жаңа технологияларды меңгеріп, жаңаша өмір сүруге үйренудің жолдарын білуге тиіс десек, басылым бетінен де сол жолдағы игі істермен кеңірек таныстырсақ деген жоспарымыз бар.
– Елбасының «Рухани жаңғыру: болашаққа бағдар» мақаласын насихаттау төңірегіндегі алқалы жиын, келелі кездесулерді қайталап басу емес пе?
– Жоқ, одан адамыз. Біздің басты мақсатымыз – ұлттық код пен ұлттық рухты басты нысанға алып, жан-жақты жұртшылыққа тарихи, ғылыми, әдеби, мәдени тұрғыда рухани азық ұсыну. Рухани жаңғыру бағдарламасы аясында өтіп жатқан түрлі іс-шаралар, ауқымды істер, ақпараттық материалдар журналымыздың электронды нұсқасында күн сайын жарияланып тұрады. Өтті-кетті материалдарға журналда орын жоқ.
– «Рухани жаңғыру» журналының ақпарат айдынындағы орны айқындалған болар. Мемлекеттік маңызды құжатты арқау еткен басылымды қолдаушылар аз емес деген ойдамыз.
– Рас, күні кеше жарық көрген журналымызды қолдаушылар қатары көп. Еліміз бойынша айтар болсақ, Алматы, Түркістан облысы, Алматы қаласы әкімдері және жұртшылығы қызу қолдауда. Алдағы уақытта кеңістігіміз кеңейетініне кәміл сенімдіміз.
Ұлбосын ИСАБЕК
Талғар ауданы
