Рухы күшті елдің келешегі жарқын. Бұл тұжырымның аясында айдарлы Алаш ұрпағының арман тілегі, өткеннен қанға сіңген салт-дәстүрі, келешекке деген құштарлығы топтасқан. Елбасы Нұрсұлтан Назарбаевтың «Болашаққа бағдар: рухани жаңғыру» атты бағдарламалық мақаласында негізінен халықтың осы тұрғыдағы сезім сілкінісін ояту көзделген.
Жүздеген жылдарға созылған тарих толқынында бұйығыланған рухани сезімді жаңғырту оңай іс емес. Сондықтан да еліміздегі зиялы қауым, облыс, аудандардағы үгіт-насихат топтары қарапайым халыққа Тәуелсіздігі тұғырланған мемлекеттің жаңа даму үрдісі басталғанын, Елбасының орайлы ойын тірек етіп, жан-жақты жаңғыруды тілге тиек етіп, бағдарлы жұмыс жасауда.
Жақында облыстағы дін істері басқармасының ұйытқы болуымен «Рухани керуен» тобы жазиралы Жаркент өңіріне келді.Топ құрамында облыстық дін басқармасы, «Нұр Отан» партиясы, медицина, және әлеуметтік сала, БАҚ қызметкерлері, имамдар және өнер ұжымдарының өкілдері бар.
Ауқымды шара алдымен Жаркент қаласындағы аудандық Мәдениет үйінің алдында 1986 жылғы Алматыдағы Желтоқсан көтерілісінің құрбандары, жаркенттік жалынды жастар Ербол Сыпатаев пен Ләззат Асановаға арналып қойылған ескерткішке гүл шоқтарын қойып, Тәуелсіздікті аңсаған қазақ жастарының асқақ рухына құрмет көрсетумен басталды.
Керуен мүшелері бұдан соң Жаркент гуманитарлық-техникалық колледжінің жиынжайында өздерін күтіп отырған аудан активімен кездесті. Кездесуді аудан әкімінің орынбасары Роза Мағрупова кіріспе сөз сөйлеп ашып, бас қосқан қауымға керуен мүшелерін таныстырды. Алғашқы сөз облыстық дін істері басқармасының басшысы Рақмет Есдәулетовке ұсынылды, «Рухани керуен» жұмыс тобының жетекшісі жиналған жұртқа Елбасы мақаласының мазмұны мен мәнін, мақсатын жүйелі әңгімесімен баяндады. Жиында топ мүшелері Қазақстанның Халық әртісі Алмахан Кенжебекова, облыстық «Жетісу» газеті бас редакторының орынбасары Жұматай Әміреев, ҚМДБ-ның Талдықорған өңірі бойынша өкіл имамы Ардақ Оразбаев, Панфилов ауданының Құрметті азаматы Шәріпхан қажы Тұрғанов сөз сөйлеп, Елбасының «Болашаққа бағдар: рухани жаңғыру» атты мақаласынан туындайтын байыпты бағдарлы мақсаттарды салиқалы ойларға жіктеп, салмақты мысалдармен тарақтап жеткізді. Сөз сөйлеушілердің орамды ой, толғанысты сезіммен өрілген әңгімелері залға жиналған қауымды ұйытып, көңілге серпіліс сыйлағанын аңғардық.
Кездесу соңы концертік бағдарламаға ұласып, оған жергілікті өнерпаздармен бірге облыс орталығынан келген жұмыс тобының мүшелері жыршы, термеші Әбіш Әділбеков, дәстүрлі әнші Кенжекей Ақжолова да ән, жырларымен шашу шашты. Бұдан соң осы колледжде жастар ресурстық орталығының ұйымдастыруымен «Рухани жаңғыру: ел ертеңінің бастауы» тақырыбында студенттердің зиялы қауым өкілдерімен кездесуі, аудандық жұмыспен қамту орталығында «Рухани жаңғыру: жарқын істердің бастамасы» деген тақырыпта деструктивке шалдыққан отбасы мүшелерін қоғамға бейімдеу бойынша әлеуметтік мәселелерін шешу жолдарын қарастыру, аудандық ауруханада «Денсаулық – болашақ кепілі» тақырыбында діни нанымына байланысты себептермен екпе, қан құюдан бас тартқан азаматтармен жұмыс жасалды. Жұмыс тобы мүшелерінің тағы бір қатары аудан ақсақалдарымен жүздесу өткізсе, Жаркент гуманитарлық-техникалық колледжінің жиынжайында «Ақпараттық түсіндіру жұмысы – діни сауаттылықты арттырып, рухани байлығымызды дәріптейді» деген тақырыпта өңір тұрғындарымен дінтанушы Тимур Нүсіпханұлы ақпараттық түсіндіру жөніндегі ой-пікірімен бөлісті.
Облыс орталығынан келген «Рухани керуен» көпшіліктің көңілінде көрікті ой қалдырды. Кездесулер барысында толғақты мәселелер қозғалып, толымды ой өрген топ мүшелеріне жергілікті халық алғыс айтып, сапарларына сәттілік тіледі.
Мырзағали НҰРСЕЙІТ.
Жаркент қаласы.
