«Қазіргі жастар кітап оқымайды». Бұл – біздің қазіргі жас буын кітапқа қызықпайды деп үлкендер шорт кесіп айтатын, ал жастардың өте жиі еститін сөзі. Алайда зерттеушілердің пікірін сұрау басқаша нәтижелермен таңғалдырды.
Жалпы, қазақстандықтар тұтастай кітапты қағаз түрінде де, электронды нұсқада да белсенді оқи бастаған. Мұны кітапханашылар да, кітап дүкендерінің қызметкерлері де растайды. «Жұмыс күндері кешке және демалыс күндері кітап сатып алушылар өте көп. Көбіне жастар мен балалар бізге ересектердің ертуімен келеді. Олар, әсіресе, фэнтези, бестселлерлік және детективтік бағыттағы кітаптарды таңдайды», – дейді кітап сатушылар.
Сарапшылардың пікірінше, жастардың оқуға деген көзқарасы дұрыс бағытқа өзгерген. Өйткені, бүгінгі таңда олардың рухани әлемін байытудың түрлі жолдары мен шарттары қарастырылған. Бұған гаджеттердің соңғы үлгілері де ықпал етеді. Ғаламтордан кез келген кітапты онлайн түрде жүктеп алып, өзіне ыңғайлы жерде, бос уақытта ашып оқуға мүмкіндік бар. Менің ойымша, қазіргі заман ағымына бұл өте ыңғайлы қадам. Себебі, қазіргі таңда жастардың таңдауындағы ең арзан деген кітаптың құны 1500-2000 теңгені құрайды. Ал мұндай бағаны кітапсүйер қауымның қалтасы көтере бермейді. Осы орайда онлайн кітаптарды оқу өте тиімді. Менің кеңесім, қымбат дүкендерден кітап сатып алудың қажеті жоқ. Оның орнына кітапханалардан уақытша алып оқып, қайтарып берген ұтымдырақ.
Қорытындылай келе айтарым, әр адам өзі үшін күніне кемінде 10-15 бет кітап оқуы керек. Оқу қызық болмаса, тыңдау үшін аудиокітап қосымшасы қарастырылған. Қысқасы, кітап – ең адал досың, тегін тәжірибемен бөліседі және қызықты сұрақтарға жауап табасың. Кітап сіздің қандай адам екеніңізді, мінезіңіздегі ерекшеліктерді айқындап беруге көмектеседі.
Ұлжан ПОЛАТ,
Абылай хан атындағы
Қазақ халықаралық қатынастар және әлем тілдері университетінің 2-курс студенті
