«Ғұндар» этноауылында Елбасының «Рухани жаңғыру» бағдарламасы аясында «Туған жерге туыңды тік» атты жастар форумы өтті.
Жастарды кіндік қаны тамған жердің тарихын танып, өскен ауылын құрметтеуді, жақсылық жасауды, қамқорлық танытуды мақсат еткен шараға аудан әкімі Рыскелді Сатбаев, облыстық жастар ресурстық орталығы директорының міндетін атқарушы Жандос Бауыржанұлы, аудандық мәслихат хатшысы Жұмахан Еңкебаев, ауылдық округтердің белсенді жастары мен Талғар қаласындағы бес колледждің студенттері қатысты.
– Жастар – қоғамның локомотиві. Ауданда 49396 жас болса, олардың 37548-і ауыл, қалғанын қала жастары құрайды. Мектеп қабырғасында 14-18 жас аралығында 10 мыңға жуық оқушы білім алуда. Сапалы білім, саналы тәрбие сіңірумен бірге спорттық шараларға белсене араласулары да көңіл қуантарлық. Елбасының бастамасымен мемлекеттік бағдарламалар, соның ішінде, «Дипломмен ауылға», «Жасыл ел» бағдарламалары жүйелі жүзеге асуда. Былтыр аталған бағдарлама бойынша 53 жас еңбек етсе, осы жылы 100 жасты маусымдық жұмыспен қамту жоспарлануда, – дей келе Рыскелді Ахметқалиұлы фо- румға қатысушыларды мерекелерімен құттықтады.
– Талғар төрінде жігерлі жастар бас қосуда. Бұл игі шара әр жастың өз ісіне немқұрайды қарамауына, саяси белсенділігін арттырып, болашаққа деген оң көзқарасын қалыптастыруына септігін тигізіп, олардың арасында көшбасшылық қасиеттерін дамытуға кеңінен жол ашып, жастар саясатын дамыту ісіне жаңа бағыт, тың қарқын береді. Тәуелсіз еліміздің 26 жылында жастардың күш-қуатымен жасалып жатқан жарқын істер аз емес. Оның жалғасын таба беретініне сенімдіміз, – деді форумға қатысқан облыстық жастар ресурстық орталығы директорының міндетін атқарушы Ж. Байқамытов.
Форум барысында қоғамдық істерде белсенділік танытып, көш басынан көрініп жүрген бірқатар жас аудан әкімінің және облыстық жастар ресурстық орталығының Алғыс хатымен марапатталды. Жерлестерінің бұл жетістігімен аудандық жастар ресурстық орталығының жетекшісі Замира Қалымбетова да құттықтады.
Бүгінгі жастардың алдында ұлттық кодты жаңғырту, оны сақтау міндеті тұрғанын көрсеткен форум барысында Талғар қалалық балалар музыка мектебінің қобызшылар ансамблі «Туған жер» атты туындысын тарту етті. Сонымен қатар, Айнұр Жабаева жетекшілік ететін «Суппер Данс» би тобы өнер көрсетті.
Салтанатты шараның соңында «Ғұндар» этноауылының шабандоздары қыз қуу, теңге ілу, аударыспақ сынды ұлттық ойындар көрсетіп, ел рухын асқақтатты.
Ұлбосын ИСАБЕК
Талғар ауданы
