Туған өлкем – жүрегімнің бір бөлшегі. Оның бүгінгі тынысы мен ертеңгі келбеті мені әрдайым толғандырады. Сондықтан «Менің шағын Отаным» атты республикалық интеллектуалдық байқауына ұсынған жобамды «Ертеңгі менің өлкем: болашақ» деп атадым. Бұл – қиялым ғана емес, туған жеріме деген шынайы жанашырлығымның көрінісі.
Жобамның өзегінде – экологиялық таза, заманауи әрі ұлттық болмысты сақтаған шағын қала үлгісі тұр. Суреттегі макетте мен болашақ өлкемнің басты нысандарын бейнеледім. Күн панельдері орнатылған ғимараттар – жаңартылатын энергия көздерін тиімді пайдаланудың белгісі. Ал биік жел диірмені – табиғатпен үйлесімде дамудың символы. Меніңше, болашақта әрбір аймақ өз энергиясын өзі өндіріп, қоршаған ортаға зиян келтірмей өмір сүруі тиіс.
Ғимараттардың сыртқы безендірілуінде ұлттық ою-өрнектерді қолдандым. Себебі технология қаншалықты дамыса да, біз өз құндылығымызды ұмытпауымыз керек. Болашақ ме- кен – заманауи әрі рухани құндылықтарға бай өлке. Мұнда кең, жарық, қауіпсіз көшелер, жасыл желекке толы аулалар бар. Көшедегі көліктер рет- ретімен қозғалып, тәртіп пен мәдениеттің үлгісін көрсетеді.
Макеттегі кішкентай үй мен жасыл аймақ – отбасылық құндылық пен табиғатқа жанашырлықтың белгісі. Мен болашақта адамдар тек технологияға емес, бір-біріне жақын, табиғатқа қамқор болуын қалаймын. Таза ауа, сұрыпталған қоқыс жәшіктері, көгалдандырылған алаңдар мұның бәрі өлкемнің ертеңгі келбеті.
Бұл жобаны жасау барысында туған жерімнің мүмкіндігін, оның даму бағытын ой елегінен өткіздім. Әр бөлшекті орналастырғанда «Елім үшін не істей аламын?» деген сұраққа жауап іздедім. Менің шағын Отаным – үлкен арманның бастауы. Егер біз бүгіннен бастап табиғатты қорғап, білімге ұмтылып, жаңашылдыққа ашық болсақ, ертеңгі Қазақстан бұдан да қуатты болары анық.
Жарас ШЕРҒАЛИ,
10 «А» сынып оқушысы
