Жетісу облысы бойынша Сауда және тұтынушылардың құқықтарын қорғау департаментіне биылғы жылдың 8 айында әр түрлі арналар арқылы барлығы 834 өтініш келіп түсті, соның нәтижесінде тұтынушылардың заңды мүддесі қорғалып, олардың пайдасына 50 миллион теңгеден астам қаржы қайтарылды. Бұл көрсеткіш – мемлекеттік органдардың жұмысы нақты нәтиже беріп жатқанын айқын аңғартады.
Бұл жөнінде Бейсен Құранбек атындағы Журналистер үйіне арнайып келіп, журналситермен кездескен ҚР СИМ Жетісу облысы бойынша сауда және тұтынушылардың құқытқтарын қорғау департаменті басшысының міндетін атқарушы Ербол Талапұлы айтты. Спикерді мәліметінше, халықтан түскен шағымдардың салалар бойынша, ең көп өтініш бөлшек сауда саласынан түскен, мұнда азаматтардың саны 247-ге жетіп отыр. Екінші орында тұрғын үй-коммуналдық шаруашылығы саласы тұр, бұл бағытта 140 өтініш тіркелді. Сондай-ақ электрондық сауда бойынша 118 өтініш, тұрмыстық қызметтер бойынша 95 өтініш, байланыс қызметтері бойынша 41 өтініш және көлік қызметтері бойынша 23 өтініш түсіп, қарастырылды. Бұл салалардың барлығы адамның күнделікті тіршілігімен тікелей байланысты болғандықтан, кездесетін мәселе де әр алуан.
Талдықорған қаласының прокуратурасымен бірлесіп атқарылған жұмыстың . нәтижесінде үй ішіндегі газ жабдықтарына нақты көрсетілмеген қызметтер үшін шамамен 4 мың тұтынушыға негізсіз ақы есептелгені анықталып, жалпы сомасы 12 миллион теңгенің қайта есептелді. Заңды бұзғандарға ҚР Әкімшілік құқық бұзушылық туралы кодексінің 190-бабының 1-бөлігіне сәйкес әкімшілік жауапкершілікке тартылып, айыппұл салынды.
Сонымен қатар қазіргі таңда кең тараған электрондық сауда мен әлеуметтік желілердегі алаяқтық әрекеттер де назардан тыс қалған жоқ. Мысалы, TikTok арқылы сапасыз косметика өнімдерін сатқан кәсіпкерге қатысты 18 азаматтан ұжымдық өтініш түсіп, департаменттің араласуымен сотқа дейінгі тәртіппен азаматтардың ақшасы толықтай қайтарылды. Сол сияқты көлік қызметтері саласында Астанаға қатынайтын 16 авиабилет үшін төленген 765 248 теңге көлеміндегі қаражатты қайтару мүмкін болды. Ал байланыс саласында ұзақ уақыт бойы интернетсіз және мобильді байланыссыз қалған тұрғындарға 234 657 теңге өтемақы төленді. Тұрмыстық қызметтер мен басқа да бағыттарда, атап айтқанда құны 330 мың теңгелік асүй гарнитурын уақтылы жасамаған кәсіпкерге қарсы сот арқылы қаражатты қайтару, сондай-ақ биологиялық белсенді қоспалар, зергерлік бұйымдар мен жаңа деп сатылып, бірақ бұрын қолданылғаны анықталған құны 1 миллион 300 мың теңгелік керамикалық плиткаға қатысты даулар азаматтардың пайдасына шешілді.
Департамент тек өтініштерді қараумен шектелмей, бақылау шараларын да қатаң жүргізуде. Есепті кезеңде 22 жоспардан тыс тексеру жүргізіліп, нәтижесінде 19 құқық бұзушылық анықталды. Сол бойынша 25 әкімшілік хаттама толтырылып, жалпы сомасы 640 100 теңгені құрайтын айыппұл салынды. Сот тәртібі арқылы қорғау мақсатында 26 талап-арыз дайындалып, сотқа жолданды және бірқатар істерге үшінші тарап ретінде қатысып, азаматтардың мүддесі қорғалды.
Департамент мамандары әрбір тұтынушыға қиын жағдайға тап болған сәтте чектерді, шарттар мен төлемді растайтын құжаттарды міндетті түрде сақтап, өз талаптарын әрқашан жазбаша түрде қою қажет екенін ескертеді. Сатушының немесе кәсіпкердің заңға қайшы келетін «тауар қайтарылмайды» деген ішкі ережелері тұтынушылардың заңмен берілген құқықтарынан жоғары тұрмайды.
«Жетісу-Ақпарат».
