Америкалық UFC промоушені бірнеше салмақ дәрежесі бойынша спортшылардың рейтингін жаңартты. Қазақстандық Шавкат Рахмонов өз салмағында екінші сатыдағы орнын сақтап қалды, – деп хабарлайды 7-su.kz ақпараттық порталы Vesti.kz сайтына сілтеме жасап.
UFC рейтингіндегі соңғы өзгерістерге сәйкес, жартылай орта салмақ дәрежесіндегі үздіктер тізімінде Шавкат Рахмонов әлі де көшбасшылар қатарында. Бұл салмақта чемпион – Ислам Махачев, ал бірінші орында Джек Делла Маддалена тұр. Отандасымыз екінші сатыны иеленіп, чемпиондық белбеуге басты үміткерлердің бірі болып қала бермек.
Спорт сүйер қауым арасында «Шавкат рейтингтен шығарылуы мүмкін бе?» деген сауалдың туындауына негіз жоқ емес еді. Себебі UFC тарихында ұзақ уақыт октагонға шықпаған спортшыларды тізімнен алып тастау тәжірибесі бар. Мәселен, кезінде Леон Эдвардс 15 ай, ал Сантьяго Понзиниббио 13 ай жекпе-жексіз жүргені үшін рейтингтен шығарылған болатын. Тіпті аты аңызға айналған Конор Макгрегор да осындай жағдайға тап болған еді. Алайда UFC басшылығы Рахмоновқа қатысты мұндай қатаң шешім қабылдамады.
Шавкат Рахмонов соңғы рет 2024-жылдың желтоқсан айында октагонға шықты. Сол кезде ол чемпион Белал Мухаммадтың орнына шыққан ирландиялық Иэн Гэрриді бес раундтық тартыста төрешілердің шешімімен жеңген болатын.
Болжамдарға сәйкес, «Номад» келесі жекпе-жегін сәуір айында АҚШ-тың Флорида штатында өтетін UFC 327 турнирінде өткізуі мүмкін. Егер бұл кездесу орын алса, оның спорттық үзілісі 16-айға созылмақ. Рахмоновтың бапкері Эдуард Базровтың айтуынша, спортшыға түсетін шақыртулар көп, бірақ басты мақсат – чемпиондық белбеу үшін таласу.
Рахмоновтың рейтингтегі орнын сақтауы – оның әлемдік MMA аренасындағы беделінің жоғары екенін көрсетеді. Жарақаттар мен чемпиондардың ауысуына қарамастан, Шавкат Қазақстанның атын әлемге танытып келе жатқан бірегей спортшы. Жанкүйерлер енді оның чемпиондық атақ үшін қашан жұдырықтасатынын асыға күтеді.
