Алматы облысының әкімі Амандық БАТАЛОВ Ақсу ауданына қарасты Матай орта мектебінің психологі Ажар Дүйсенбекованы қабылдады.
Жасөспірімдерге зорлық көрсету фактісін анықтап, кінәлінің жазаға тартылуына мұрындық болған, ең бастысы жәбір көрген жасөспірімдерге дер кезінде психологиялық көмек көрсетіп, жарқын өмірге бет бұрғызған ұстаздың еңбегі ескерусіз қалған жоқ.
Аймақ басшысы өз ісіне асқан жауапкершілікпен қарап, жасөспірімдердің болашағы үшін алаңдаған маман жайлы блогер Жанна Ахметованың «Фейсбук» парақшасынан білгенін айтты. Орын алған оқиғадан бері арада біраз уақыт өтсе де кәсіби маманды марапаттаудың ешқандай да кеш еместігін тілге тиек етті.
– Әрбір маман иесі, оның ішінде, педагог өз қызметін өте жоғары деңгейде атқаруы тиіс. Әсіресе, қазіргі кезде көпшілікке психологиялық көмек ауадай қажет. Құрметті Ажар Дүйсенбекова! Балалар суицидінің алдын алып, қиын жағдайда оларға кәсіби маман ретінде көмектескеніңіз үшін алғысымды білдіремін. Қиын жағдайға тап болғанда жасөспірімдер тығырыққа тіреліп, жарқын өмірге шығатын жол таппай қалады. Айналасында қаншама жақын адамдары жүрсе де, өз мәселесімен жалғыз өзі бетпе-бет қалуға тура келеді. Сондай кездерде баланың көңіл-күйіне мән беру, әртүрлі тақырыпта әңгімелесу, тығырықтан шығатын жол көрсету отбасында ата-ананың, ал мектепте мұғалімнің жауапкершілігінде болатынын ұмытпағанымыз жөн. Артылған сенімге селкеу түсірмей, жауапкершілікті үлкен абыроймен атқара білдіңіз. Сіздің осы кәсіби біліктілігіңіз барлық педагогқа үлгі болуы керек, – деп ризашылығын білдірген облыс әкімі Ажар Дүйсенбековаға Құрмет грамотасын ұсынып, ноутбук сыйға тартты.
– Мен бір ерекше іс тындырдым деуден аулақпын. Тек өзімнің кәсіби міндетімді толық орындадым. Кез келген психолог маман да мұны істей алатыны даусыз. Әрбір бала мейірім мен махаббатқа бөленіп өсуі керек. Балаға зорлық, зомбылық жасауға ешкімнің де қақысы жоқ. Сондықтан біз әрбір баланың тағдырына тікелей жауаптымыз. Мені елеп-ескеріп шақырғаныңызға, марапат ұсынғаныңызға шын жүректен алғысымды білдіремін, – деді ұлағатты ұстаз.
Ажар Дүйсенбекова Матай орта мектебінде психолог мамандығы бойынша қызмет істейді. Өзінің 11 жылдық қызметтік тәжірибесінде біршама жетістікке қол жеткізген білікті де білімді маман. Отбасында үш ұл тәрбиелеп отырған бақытты ана. Мамандығын мақтаныш санайтын ұлағатты ұстаз 2018 жылы екі бірдей жасөспірім қыздың тағдырына араша түскен еді. Нәтижесінде, жәбір көрсетуші заңға сәйкес өз жазасын алды. Ал болашағынан үлкен үміт күттірген қыздардың жаңа өмірге аяқ басуына психологиялық тұрғыда қолдау көрсеткен психологтің еңбегі еш кетпеді. Жасөспірімдердің жарқын болашағы үшін еңбек еткен ұстаз бар марапатқа да лайықты.
Алматы облысы әкімінің баспасөз қызметі
