Іле ауданындағы Боралдай елді мекенінің «Жайнақ» ықшамауданында интернет сапасы бойынша тұрғындармен кездесу өтті. Оған ҚР Цифрлық даму, инновация және аэроғарыш өнеркәсібі министрлігі Телекоммуникация комитетінің төрағасы Ержан Мейрамов, телекоммуникациялық компаниялардың және ұялы байланыс операторлары «КарТел» ЖШС, «МТС», «Кселл» АҚ, «Алматытелеком» және «Транстелеком» өкілдері қатысты.
Шараға Іле ауданы әкімінің орынбасары Мәрлен Қасенов, Боралдай ауылының әкімі Данияр Қоңырбаев, аталған шағынаудан тұрғындары және БАҚ өкілдері келді. Коронавирус жағдайына байланысты кездесу ашық жерде, №40 мектептің ауласында өтті.
Басқосуда модератор - аталған министрліктің телекоммуникация комитеті Алматы қаласы және Алматы облысы бойынша байланысаралық инспекциясының бастығы Асхат Рахматуллин қазіргі уақытта бүкіл Қазақстан бойынша байланыс сапасын арттыру бағытында белсенді жұмыс жүргізіліп жатқанын айтып, тұрғындарға кездесуге қатысып отырған операторларға сұрақтар қоюға болатынын жеткізді.
Сұрақтардың көбі интернеттің сапасына қатысты болды. Тұрғындар мектеп бағдарламасына сәйкес балаларын онлайн оқытуға қатыса алмай отырғандығын айтты. Сондай-ақ, олар ұялы байланыс қызметтерінің жоғары тарифтері, трафиктің лимитін жылдам тұтыну туралы бірқатар өзекті мәселелерді ортаға салды. «Қазақтелекомның» талшықты-оптикалық желісін сенімдірек ету туралы өтініш түсті.
Қызметтердің ақысына қатысты талаптарға сарапшылар Қазақстанда мобильді интернеттің ең төменгі бағасы бар екенін жеткізді. Мамандар әлемнің 230 елінің ішінде біздің республика 1 ГБ деректердің ең арзан орташа құны бойынша үшінші орында тұрғанын мәлімдеді.
Жиында Ержан Мейрамов бұқаралық ақпарат құралдарына және осы ауылдағы сигналды өлшеу мен интернетті қамту нәтижелері бойынша «КаР-Тел» ЖШС мен «МТС» ЖШС тарапынан заңбұзушылықтар анықталғанын хабарлады. Оларды жою туралы нұсқаулар берді. Байланыс сапасын арттыру үшін «Beeline» және «Tele-2» операторлары базалық станция орнатуды ұсынды. Ол үшін операторлардың техникалық қызметтері ортақ шешімге келіп, байланыстың тиімді орналасу нүктесін таңдап, екі аптада ішінде бір шешімін айтуы тиіс.
Кездесу соңында «ауылда интернет нашар» деп өзекті мәселе көтерген «Жайнақ» шағынауданының тұрғыны Лаура Шынғожановамен сұхбаттасқан едік. Ол: «Біз «Жайнақ» ықшамауданында 5 жылдан бері тұрамыз. Екі жылдай уақыт болды, байланыс пен интернет жоқ. Мен енді Beeline-ға да, Tele-2-ге де сенбеймін. Олар құрғақ сөз, өтірік уәде бергеннен басқа ештеңе тындырмайды. Маған балаларыма білім беру үшін жоғары сапалы интернет керек. Егер қыркүйекке дейін өзгеріс болмаса, министрдің блогына жазамын», – деді.
Шарада аудан басшылығы мен Боралдай ауылының әкімі жер учаскесін таңдауға, құжат айналымына қатысты мәселелер бойынша барынша көмек беретіндігін айтты.
Рамазан ЕЛЕШЕВ
Іле ауданы
Алматы облысы
