Тәрбиеші – баланың екінші ата-анасы, алғашқы ұстазы. Жас баланың өміріне жол сілтейтін дара тұлға. Оған артылған жауапкершілік жүгі тым ауыр. Сондықтан болар, тәрбиешінің ең басты міндеті – әр баланың бойындағы жақсы қасиеттерді ашып, оларды дұрыс бағытта дамытып, еліміздің ертеңгі тізгінін қолына ұстайтын нағыз адал азамат тәрбиелеу.
Тәрбиеші мамандығын таңдаған, «бала жанының бағбаны боламын» деп қалаған әрбір жан ең бірінші баланың мөлдір бұлақтай тұп-тұнық әлеміне жарқыраған күндей шуақ шашып, сәбиді жан жүрегімен жақсы көріп, жеткіншекке төнген қауіп-қатердің алдына ала білгені жөн. Міне, осы қасиеттерді бір бойына жиған адам ғана адамзатты тәрбиелейтін мамандықты жан-тәнімен жақсы көріп, істей алады. Себебі бүгінгі жас буын ертеңгі елдің жалынды жастары, жеке дара тұлғасы болып қалыптасатыны заңдылық.
Күн сайын емес, сағат сайын дамып келе жатқан заманда тәрбиешіден тек кәсіби білім ғана талап етілмейді. Рухани азыққа шөліркеп жүрген кезеңде баланың бойына рухани мол азықты егу де тәрбиешінің міндетіне жатады. Сол үшін мамандығын сүйген, «мамандығым – мақтанышым» деп білген әрбір маман шығармашылық ізденісті рухани байлықпен ұштастыра білгені жөн. Қазақтың бесік жырымен, аңыз, әңгімелерімен, лиро-эпостық жырларымен балаларды сусындатса, олардың болашағы жарқын болары анық. Сол әлемнің қақпасын ашу үшін тәрбиеші нәзік сезім мен терең түсінікке ие болуы қажет. Баланың бойындағы ұшқынды байқап, оны алауға айналдыру – нағыз шебер тәрбиешінің қолынан келетін іс. Сол себепті де тәрбиеші тек білім беруші ғана емес, әр баланың жүрегіне жол тауып, оның жан дүниесін нұрландыратын шамшырақ іспетті.
Баланың алғашқы ұстазы, сенімді досы, кейде тіпті, өмірлік бағдар берушісі болған тәрбиеші баланың қуанышына ортақтасып, қиын сәттерінде қолдау көрсететін жан. Осындай қасиеттер арқылы ғана тәрбиеші баланың сеніміне ие болып, оның шынайы дамуына ықпал ете алады. Ал бүгінгі қоғам дамыған, өз-өзіне сенімді, дамушы ұрпақты күтеді.
ХХІ ғасыр тәрбиешісі – жаңашыл тұлға болуға міндетті. Ол заман ағымына ілесіп, жаңа технологияларды меңгеріп, оларды тиімді қолдана білуі керек. Бірақ технология қаншалықты дамыса да, адами құндылықтар әрдайым басты орында тұруы тиіс. Себебі нағыз тәрбие – жүректен жүрекке жететін жылылықта, мейірімді, таза махаббатта жатыр. Баланың әлемі ең таза әлем. Кіршіксіз таза ниетті, ақ адал көңілді, мөлдір махаббатты лайлауға, былғауға, ластауға ешкімнің қақы жоқ. Біз тілге тиек еткен заманауи тәрбиеші осындай олқылықтың алдын алатын, жаңалыққа ұмтылатын, адамгершілік қасиеттерді бәрінен биік қоятын, білім мен мейірімнің, жаңашылдық пен жауапкершілікті бір бойына жия білетін тұлға болуға міндетті.
Маржан ҚАБЫЛЖАН,
«Жетісу облысы білім
басқармасының Талдықорған қаласы бойынша білім бөлімі»
мемлекеттік мекемесінің «Еңбек ауылындағы мектепке дейінгі шағын орталығы бар №22 орта
мектеп» КММ «Айжұлдыз» шағын
орталықтың тәрбиешісі
