Кез келген ортада өзінің жан-жағына сыйластығымен, дос-жаранға деген ақ-адал пейілімен, берік ұстанымымен, рухани болмысымен, жақсы қасиеттерімен ерекшеленетін жандар болады. Сол санаттан Күлжахан АБДРАХМАНОВАНЫ көреміз.
Жер жаннаты Жетісудың көрікті бір пұшпағы саналған Кербұлақ ауданына қарасты Шоқан ауылында өмірге келген Күлжахан Рамазанқызы алпыстың асқарына шығып отырған аяулы жар, ардақты ана, немерелердің сүйікті әжесі, құрметті әріптес.
Еңбек жолын 1985 жылы Кербұлақ ауданындағы Ш.Уәлиханов атындағы музейде бастаған Күлжахан Рамазанқызы аталған мекемеде жиырма жылға жуық абыройлы еңбек етіп, 2004 жылы отбасымен Талдықорған қаласына қоныс аударған. Міне, содан бері №3 «Балбөбек» сәбилер балабақшасында аспаз болып келеді.
Күлжахан Рамазанқызы құдай қосқан қосағы Нұрланбек екеуі тамырын тереңге жайған зәулім бәйтерек тәрізді. Аяулы ана, ардақты әкенің 4 қыз, 1 ұлынан тараған 17 немересі бар.
Қайын жұртын өз туғанындай қабылдай білу, құда-жегжатпен сыйластық, күйеубалаларға, келінге туған баласындай қарау, отбасы тіршілігін қызметпен үйлестіру – осының барлығы үлкен жүрек, мейірім мен адами махаббаттан туындайтын қасиет десек, осы санаттан табылған Нұрланбек зайыбы Күлжаханды аялаудан бір жалыққан емес.
Күлжахан отағасы екеуі балаларын қатарынан кем қалдырмай, барлығына арнайы орта, жоғары білім алып берді. Бүгінгі күні бұл шаңырақтың ұл-қыздары әр салада абыройлы еңбек етуде. Қыздары Эльвира Талдықорған Жоғары медициналық колледжін бітіріп, «Алпамыс» қалпына келтіру орталығында мейірбике болса, Арайлым да аталмыш колледждің дипломын алған ақ халатты абзал жан, отбасында бес бала тәрбиелеп отыр. Марал Политехникалық колледжді программист (бағдарламашы), Мира аталмыш колледжден архитектор мамандығын алып шыққан. Кіші қыздары да ана бақытына ие болып, жарларымен жарасымды өмір кешіп, үш баладан тәрбиелеп отыр. Ұлы Рүстемнің қызы Айжан І. Жансүгіров атындағы Жетісу мемлекеттік университетінен өткен жылы дефектолог бөлімін бітіріп, қазіргі кезде апасы қызмет ететін №3 «Балбөбек» сәбилер балабақшасында мамандығы бойынша жұмыс істейді.
Өзінің адамға деген жылылығы, қайырымдылығы, биязы мінезімен Күлжахан Рамазанқызы ұжымда сыйлы, үлкен абыройға ие адам. Жан жылуын, ақыл-кеңесін әріптестерінен, жастардан еш аяған емес. Мол тәжірибесімен бөлісіп, жас қыздарға білгені мен түйгенін бөлісуден еш жалықпайды. Ал бес саусағынан бал тамған аспаздығы – ол бөлек тақырып.
Жақсы кәсіби маман, отбасының тірегі, аяулы жар, ардақты әже, адал дос, жақыны түгіл жатқа да қамқор бола білетін болмысы бөлек, рухы биік жан бүгінгі күні құрметті демалысқа шығып отыр. Әдетте үлкендер бата бергенде: «Еңбегіңнің жемісін, зейнетін көр» дейді емес пе?! Сондықтан ұжымның, ата-аналардың, халықтың алғысына бөленіп, зейнетке шығып отырған Күлжахан Рамазанқызына ұзақ та салиқалы, бақытты ғұмыр кешіңіз дегіміз келеді.
Бақытхан САДЫХАНОВА,
№3 «Балбөбек» сәбилер балабақшасының
кәсіподақ төрайымы
Талдықорған қаласы
Сурет ғаламтордан алынды
