– Ардақ Айдарқұлұлы, алдымен Текелі қаласында өткен «дөңгелек үстелдің» негізгі мақсаты жайында айтып өтсеңіз?
– Бұл жиынның басты мақсаты – қаржылық бұзушылықтардың алдын алу және мемлекеттік ұйымдарда қаржы тәртібін нығайту. Біз жыл сайынғы аудит барысында қайталанып отырған қателіктерді талдап, олардың себептерін жүйелі түрде түсіндіруді қолға алдық. Қаржылық тәртіп тек есеп жүргізу мәселесі ғана емес, бұл – басқару мәдениеті. Әр мемлекеттік мекеме басшысы мен қаржы қызметкері бюджет қаражатына қоғам сенімі тұрғысынан қарауы тиіс. Сондықтан біз алдын алу шараларына көп көңіл бөлеміз.
– Жиында қандай мәселелерге баса назар аудардыңыздар?
– Негізінен қаржылық тәртіпті сақтау, аудит сапасы және цифрлық жауапкершілік мәселелеріне ден қойылды. Сондай-ақ, аудит нәтижелерінде анықталған бұзушылықтардың себептерін талқылап, оларды болдырмау жолдарын қарастырдық.
– Цифрлық қолтаңба мен электронды банкинг жүйесіне қатысты түсіндіру жұмыстары жүргізілді ме? Жалпы, бұл бағыттағы басты тәуекелдер қандай?
– «Дөңгелек үстел» кезінде қатысушыларға электронды банкинг жүйесімен жұмыс істеу тәртібі жан-жақты түсіндірілді. Сонымен бірге цифрлық технологияларды пайдалану кезінде жеке жауапкершілікті арттыру мәселесіне мән берілді. Қазіргі кезде қаржылық операциялардың басым бөлігі электронды форматқа көшті. Бұл, әрине, ыңғайлы әрі ашықтықты қамтамасыз етеді. Десек те цифрлық қауіпсіздік пен жауапкершілік мәселесі өзекті болып отыр. Сондай-ақ, біз жиында электрондық цифрлық қолтаңбаны (ЭЦҚ) өзге тұлғаға пайдалануға берудің заңсыз екенін түсіндірдік. Енгізілген жаңа нормаларға сәйкес енді ЭЦҚ-ны басқа адамға беріп қойған тұлға да, оны заңсыз пайдаланған адам да әкімшілік жауапкершілікке тартылады. Бұл өзгеріс – цифрлық мәдениетті арттыруға және қаржылық қауіпсіздікті күшейтуге бағытталған маңызды қадам.
– Мемлекеттік ұйымдарда қаржылық сауаттылықты арттыру бағытында жүзеге асырылып жатқан шаралар аз емес шығар?
– Біз жыл сайын түсіндіру және әдістемелік кездесулер ұйымдастырамыз. Бұл жолғы «дөңгелек үстел» де сондай шаралардың бірі болды. Қатысушыларға нақты мысалдар келтіре отырып, бұзушылықтардың себебі мен салдарын түсіндіреміз.
Айта кетейін, есептілікті сапалы жүргізу, электронды жүйелерді дұрыс пайдалану және қаржылық құжаттарды рәсімдеу мәдениетін жетілдіру бағытында кездесу өткізу жалғаса береді.
– Мұндай басқосудан қандай нәтиже күтесіздер?
– Бұл – тәжірибе мен жауапкершілікті арттыруға оң ықпалын тигізеді. Біз әр мекеме басшысы мен есепшілерінің өз қызметінде ең бастысы қаржылық тәртіпті сақтау қағидатының басшылыққа алынатынына сенеміз әрі соны қалаймыз. Кездесу соңында мекемелерге жүйелі бақылау мен тұрақты мониторинг жүргізу тапсырылды. Осындай талқылаулар тәжірибе алмасуға, тиімді басқару мен ашықтықты қамтамасыз етуге мүмкіндік береді.
– Облыстағы қаржылық тәртіпті нығайту бағытындағы жұмысқа қандай баға берер едіңіз?
– Жалпы, жаман емес, оң бағытта келеді. Соңғы жылдары көп мекеме есеп жүргізу мәдениетін жетілдіріп, бақылау тетіктерін күшейтті. Бірақ, оған тоқмейілсімей, әлі де бұл саладағы істі үздіксіз дамыту қажет. Қаржылық тәртіп – бір реттік іс-шара емес, ол тұрақты және жүйелі жұмысқа айналуы тиіс. Біздің басты мақсат – қаржы мақсатты жұмсалып, қоғам алдындағы сенімді нығайту. Сол үшін тексеру комиссиясы бұдан әрі алдын алу, түсіндіру және бақылау бағытындағы жұмыстарды жалғастыратын болады.
– Рахмет!
Айгүл БАЙЖҰМАҚЫЗЫ
