Қазақ елі – менің екінші Отаным. Қазақстан алғаш рет Тәуелсіздігін жариялағанда Түрік мемлекеті бірінші болып мойындады. Бауырлас елдің азаттығына қуанған түріктердің ішінде мен де бармын десем артық айтпағаным. Кейін Жаратушының қалауымен өзім қуанған елдің топырағын басу бұйырыпты. «Қазақстанға оқуға барасың» деген хабар келгенде қалпағымды аспанға атып, көкірегімді қуаныш кернеген күн әлі есімнен кете қойған жоқ.
1994 жылы Қазақстан мемлекетінің Талдықорған қаласына білім іздеп келдім. Атажұрт мені бірден бауырына басып, құшағына қысты. Туған баласы келгендей әр қадамыма қуанып, жақсылыққа жетелей берді. Талдықорған қаласындағы Жетісу мемлекеттік университетінде математика-информатика факультетінде 4 жыл білім алдым. Барлық жастық шағым, қызықты күндерім өткен сәттер бүгінге дейін менің жүрегімнің түпкірінде сағыныш болып сақталады. Ол жақтан жаңа достар, туыс таптым. Дәл осы Қазақстанда оқып жүргенде бауырлас елдің әрбір мерекесін сол жердің азаматтарымен бірге атап өттім. Әсіресе мен үшін орны бөлек мерекенің бірі – Тәуелсіздік мерекесі! 16-желтоқсан жақындаған кезде бірге оқыған курс- тастарыммен атаулы мерекені кең көлемде атап өтетінбіз.
Тәуелсіздік пен Желтоқсан оқиғасының тарихын зерделеп, ол жайлы кең көлемде мағлұмат алдым. Өз тарапымыздан университет ішіндегі шараларға қатысып, Тәуелсіздік пен Желтоқсан жайлы ой қозғағанымыз есіме түсіп отыр.
Ұмытпасам, дәл осы Тәуелсіздік мерекесі қарсаңында Жетісу университетінде үлкен шара ұйымдастырылды. Біз 41-41 «а» тобы болып бөлінетінбіз. Физика-математика факультетінің барлық тобы осы мерекеге қатысты. Сол кезде біздің топ Желтоқсан оқиғасынан қойылым қойып, көптің көңілін аударған еді.
Желтоқсан оқиғасының қаһарманы Қайрат Рысқұлбектің ерлігін шағын спектакльге айналдырып, Қайраттың: «Атам десең атыңдар, Қазақ деген атым бар…» деген сөздері әлі күнге дейін жадымнан өшкен жоқ. Математика мамандығында оқып жүрміз дегеніміз болмаса, біздің топтың студенттері өте өнерлі болатын. Жасұлан Мұқамановтың домбырамен салған әні әлі күнге дейін санамда жаңғырады. Өзіммен Анадолы елінен білім іздеп барған Махмуд Юрдагул да тамаша әнімен көрер- менді таңғалдырған. Әсіресе сол кезде Марат Омаровтың «Стамбул мен Алматы» әнін жастар көп айтатын. Міне, сол әнді сахнада шыр- қатып, Тәуелсіздік мерекесін шаттықпен атап өтетінбіз. Бұл мерекені өзім оқыған кезде 4 жыл бойы атап өттім және жыл сайын 16-желтоқсан келген кезде Қазақстанда өткен күндерім есіме оралады. Желтоқсанның ызғарлы күнін Талдықорғанда жүріп жадыма сақтасам да Анадолыда жүріп ызғарын сеземін. Мәңгілік жүрегіме жылу сыйлаған Қазақстанның Тәуелсіздік мерекесі құтты болсын! Атажұрттағы барлық бауыр- ымды мерекесімен құттықтап, бауырлас мемлекеттердің байрағы бірге желбірей берсін деген тілекті арнағым келеді.
Орхан ГЮНЕШ
Анкара, Түркия
