Өмірдің бұралаң жолында адамдығын жоғалтпай, жақынына жанашыр, еліне қамқор болған азаматтардың көпшіл, бауырмал қасиетін айшықтап жазудың өзі бір ғанибет. Туыс-туғанына қарайласып, ағайын арасында абыройлы ғұмыр кешіп келе жатқан жанның бірі Серік Мамлеев. Осынау бегзат болмысты жан жетпістің желкенін көтеріп отыр.
Бүгінде қарттыққа қадам басқан Серік Бекентайұлының өмір жолы туралы аз-кем толғанып өткіміз келеді. Ол 1954 жылы 16 желтоқсанда бұрынғы Талдықорған облысына қарасты Лепсі стансысында дүниеге келген. Әкесі Бекентай Мамлеев Абай атындағы Қазақ мемлекеттік педагогикалық институтын үздік дипломмен бітіріп, орта мектепте мұғалім, аудандық оқу бөлімінің инспекторы, саяси ағарту кабинетінің меңгерушісі, аудандық партия комитетінің нұсқаушысы, кеңшардың партия бюросының хатшысы, жұмысшы жастардың кешкі мектебінің директоры, Дін істері жөніндегі кеңестің уәкілі, облыстық партия комитетінің саяси ағарту үйінің кеңесшісі болып жұмыс істеген.
Мақала кейіпкерінің анасы Рашида Мамлеева Алматы қаласындағы Қазақ мемлекеттік қыздар педагогикалық институтында оқып, білім беру, сауда және тұрмыстық қызмет көрсету салаларында еңбек еткен.
Серік Бекентайұлының Сәбира, Сәлима және Салтанат есімді үш қарындасы бар. Кейіпкеріміз Серік орта мектепті 1973 жылы бітіргеннен кейін Киров ауданына қарасты Крупская ауылында қызылша қабылдаушы болып жұмысқа орналасады. 1975 жылы Алматы қаласындағы Қазақ мемлекеттік ауылшаруашылығы институтына түсіп, орман шаруашылығы факультетінде оқиды. Институт қабырғасында жүріп қоғамдық шараларға белсене араласып, редколлегия және студенттік кеңестің мүшесі болған. 1978 жылы «Бони-тет» атты вокалды-аспаптық ансамбль құрып, онымен бірге Целиноград және Көкшетау облыстарындағы орман шаруашылықтарында концерт қойған.
Институтты 1980 жылы аяқтаған соң Талдықорған облысына жолдамамен жіберіліп, Қаратал орман шаруашылығына орманшының көмекшісі болып орналасады. 1982 жылы облыстық орман шаруашылығы басқармасының аға инженері, 1989 жылы Талдықорған орман шаруашылығының бас орманшысы – директордың бірінші орынбасары болып бекітіледі. Мәскеуде ағаш өңдеу өнеркәсібі және орман шаруашылығы қызметкерлерінің слетіне қатысып, Қазақ КСР-ін таныстырады. Сонымен қатар, комсомол ұйымының хатшысы және кәсіподақ комитеті төрағасының орынбасары қызметтерін атқарған. 1992 жылы орман және аңшылық шаруашылығы басқармасының өндірістік бөлімінің басшысы қызметіне ауысады.
1999 жылы Талдықорған облысы таратылып, Алматы облысына қосылғаннан кейін Серік Бекентайұлы орман шаруашылықтарын Алматы облысының құрамына беру жөніндегі комиссия төрағасы болып тағайындалады.
Серік Бекентайұлы орман шаруашылығында 20 жылға жуық уақыт қызмет етті. Оған қоса ел үшін еселі жүкті еңсеріп, ауылдастары, ағайындары арасында сый-құрметке бөленген жан. Ендеше, 16 желтоқсанда 70 жасқа толатын, қызы Жанайым мен күйеу баласы Амантайдың ортасында төрт немересін сүйіп, бақытты ғұмыр кешіп жатқан арда азамат ғасыр жасасын деп Жаратқаннан тілейміз.
Арда БИ
