Домбыра – ұлтымыздың басты музыкалық аспабы, сан ғасырлық тарихы мен сырлы шежіресін бойына жинаған киелі жәдігер. Онымен тартылатын күй асыл мұралардың бірі болса, ән айту өнерінде ата-бабамыздан келе жатқан салт-дәстүріміздің бейнесі бейнеленген. Ұлы өнеріміз ұмыт қалмасын деп, ұлттық қазынамызды болашақ ұрпаққа дәріптеп, жанашыры болып жүргендер жетерлік. Сондай жанның бірі – Үштөбе қаласындағы балалар шығармашылығы орталығы домбыра пәнінің ұстазы Жанар ТҰТҚАБЕКОВА.
Қасиетті домбыраны қолына алып, сан ғасырдан жеткен қоңыр сазды бүгінгі ұрпақтың бойына сіңіруге аянбай еңбек етіп жүрген ұстаз Шымкент облысы, Ордабасы ауданы, Бөген ауылында туған. Бала күнінен қазақтың қасиетті домбырасын жанына серік еткен жан ауылдағы Ыбырай Алтынсарин атындағы орта мектепті тамамдап, 1990 жылы Қанабек Байсейітов атындағы музыкалық училищеде білім алады. Кейін 2012 жылы І. Жансүгіров атындағы университетіне оқуға түсіп, «Музыка және ән» мамандығын тамамдайды. Еңбек жолын 1994 жылы Қаратал ауданындағы балалар шығармашылық орталығынан бастайды. Содан бері балаларға ұлттық аспапта ойнауды үйретіп, аталмыш мектепте табан аудармай жұмыс істеп келеді.
– Қазақ пен домбыра – егіз ұғым. Домбыра әрбір қазақтың рухын көкке көтеретін құнды қазынамыз болуы тиіс. Біздің мақсатымыз – өскелең ұрпақты мектеп қабырғасынан бастап қазақтың ұлттық аспаптарында ойнауды үйрету, дәстүрлі әнші болуға тәрбиелеу. Сол үшін де ауданымызда қандай шара болмасын ұлттық аспаптармен дәстүрлі ән айтуды қолға алып отырмыз, – дейді кейіпкеріміз.
Өнерлі жанның өрісі кең. Ұлттық дәстүрімізді ұлықтап жүрген ұстаздың шәкірттері бүгінде халықаралық, республикалық додаларда топ жарып жүр. Атап айтсақ,2021 жылы республикалық «Жас Дарын – 2021» атты балалар байқауында «Аспапта өнер көрсету» аталымы бойынша Ердос Сергазинов бас жүлдегер атанды. 2020 жыл II Халықаралық «Ұлы дала рухы» байқауында «Балдәурен» домбырашылар ансамблі жеңістің желкенін көтерді.2021 жылы домбыра сыныбының оқушысы Даниал Ашимжан республикалық «Дарынды Дарабоз» атты балалар байқауында «Аспапта өнер көрсету» аталымы бойынша бас жүлдені қанжығасына байлады. 2023 жыл республикалық «Дала сазы» байқауында Ершат Байқаданұлы 1-орынды иеленді. Биыл «Гүлнар фест» халықаралық байқауында МейіржанСапарғали, Нұрсұлтан Уәлихан бас жүлдені еншіледі.
Білікті маманның еселі еңбегі ескеріліп, 2023 жылы «Дарынды Дарабоз» байқауында «Үздік ұстаз» төсбелгісін, 2021 және 2024жылдары республикалық «Жас Дарын» орталығы берген«Педагогика саласының үздік қызметкері» төсбелгісін тақты.
Ұлы ақын Қадыр Мырза Әлінің «Нағыз қазақ қазақ емес, нағыз қазақ – домбыра» деген сөзінің зор мәні бар. Олай болсашәкірттерін домбыра үйірмесінде ғажап өнерге баулып, шығармашылық ізденістің үстінде жүрген ұстаз балалардың домбыраға деген сүйіспеншілігін арттыруда.
Дәстүрлі ән десе ішкен асын жерге қоятын отбасының ұл-қыздарына дейін өнерлі. Қай аспапты берсең де еркін ойнайды. Отағасы Жұмағазы Тұтқабеков аталмыш шығармашылық орталықтың директоры,үлкен ұлы Жандос Сергазинов Жылыбұлақ ауылындағы Мәдениет үйінің директоры. Кіші ұлы Ердос Сергазинов Құрманғазы атындағы Қазақ ұлттық консерваториясының студенті. Қазақ өнерін жоғары бағалайтын, бабаларымыздан қалған жырды жаңғыртатын осындай жандар көбейе берсін демекпіз.
Айдар ҚАЛИЕВ
