Облыстық Сәкен Сейфуллин атындағы әмбебап кітапханада «Малшылардың маршалы» атанған Жазылбек Қуанышбаев жайлы «Жаз ата» кітабының тұсаукесері өтті. Шығарма авторы Мақсат Сейдалиев Жазылбек Қуанышбаевтың 125 жылдық мерейтойына орай шығарған кітабында еңбек адамының кәсібіне адалдығы, кісілік келбеті жайлы ой толғайды.
Кітаптың алғашқы бетінде ел Президенті Қасым-Жомарт Тоқаевтың «Асылдарымызды ардақтау арқылы елдігімізді еңселендіре түсеміз» деген тағылымды сөзі жазылған. Келесі бетте Екі мәрте Социалистік Еңбек Ері Жазылбек Қуанышбаевтың еңселі суреті қойылған. «Ұрпаққа ұлағат», «Ел есінде», деп аталатын кітапта автор шопанның мал өсірудегі тәжірибесі, Қоян жылғы ауыр қыста Жазылбек Қуанышбаев мал қырылып қалмасын деп қой-ешкіні үйіне кіргізіп баққаны, өздері жейтін ұнды қой-қозыға беріп, аман алып қалғаны жайлы естелік жазады. Солайша, ел несібесін сақтап қалғандығын әдемі суреттейді.
Кітаптың мағынасын Болатбек Әбішовтың:
Кезінде терін төгіп, білек түрген,
Еңбегің ұмытылмас елге сіңген.
Қос жұлдыз кеудесінде жарқырап бір,
Жүргендей көрінесіз әлі бізбен, – деген өлең жолы Жазылбек атаның елге сіңірген еңбегін, қадір-қасиетін аша түседі.
Рухани шарада автор Мақсат Сейдалиев сөз алып, шығарманы жазудағы ізденіске, еңбек адамының тұлғалармен сыйластығына, жары екеуінің отбасылық қиындықты бірлесе жеңе білген мықтылығына тоқталады. Шарада кітапханашы Мейрамгүл Жабиева мен автордың ұлы Өсер әкесінің кітапты құрастырудағы ізденімпаздығына, жеке басының адалдығына, рухани әлемдегі орнына, ұстаздық ұстанымына, қоғамдағы белсенділігіне тоқталып, өмірін көпке үлгі етті.
«Жаз ата» кітабының кейіпкері Социалистік Еңбек Ері, Ленин, «Алтын жұлдыз» ордендерінің иегері жастарға үлгі. Халыққа адал еңбек етсең абыройыңның артатынының дәлелі.
Гүлжан ТҰРСЫН
