Спорт сарайында балаларға арналған «Қош келдің, Жаңа жыл!» атты Президент шыршасы өтті. Мерекелік шараға облысымыздағы аз қамтылған және көпбалалы отбасыларынан шыққан, жетім және ата-анасының қамқорлығынсыз қалған оқу үздігі, спортта, шығармашылықта жетістіктерге жеткен 200-ден аса бала қатысып, шат-шадыман қуанышқа бөленді.
Шырша тойына облыс әкімі Бейбіт Исабаев қатысып, Жетісу өңірінің өрендерін ҚР Президентінің атынан Жаңа жыл мерекесімен құттықтады.
– Әр жыл сайын еліміздің барша балалары Президенттік шыршаны асыға күтеді. Биылғы шыршаға да облысымыздағы ең дарынды, белсенді деген оқушылар шақырылды. Сіздер жыл бойы жақсы баға алып, өздеріңіздің аудан, ауылдағы мектептің атын шығарып, үздігі атанып жүрсіздер. Білім – бұл жетістікке бастайтын қадам десек, елімізде сапалы білім алуға барлық жағдай жасалған. Сіздерді Жаңа жыл мерекесімен шын жүректен құттықтаймын, дендеріңізге саулық, оқуда толағай табыс тілеймін, армандаған армандарыңыз орындалсын, – деген аймақ басшысы балаларға құттықтау қағазы мен планшет, аспалы сөмке (рюкзак) сыйға тартып, жаңажылдық тәттілер табыс етті.
Мереке аясында Талдықорған қаласындағы №16 орта мектеп-гимназиясының оқушылары Людмила Ким мен Әбілмансұр Сәкен осындай керемет шырша кешін ұйымдастырғаны үшін алғыстарын білдірді.
– Мен үздік оқушымын әрі «Алтын сақа», «Ақ бота», «Кенгуру» секілді байқаулардың жүлдегерімін. Осындай тамаша шараға қатысқаныма өте қуаныштымын. Жаңа жыл баршаңызға сәттілік пен табыс әкелсін! – деді 4-сынып оқушысы Әбілмансұр Сәкен.
Кеште балалар үшін түрлі ертегі кейіпкерлерінің қатысуымен мерекелік қойылым ұйымдастырылды. Мың бұрала билеген балаларман бірге облыс әкімі жаңажылдық шыршаны жақты. Сондай-ақ шара барысында облыстың 2024 жылғы білім саласындағы жетістіктері туралы дайындалған арнайы бейнеролик көрсетілді. Жаңажылдық кеш мерекенің басты кейіпкерлері Аяз ата, Ақшақармен бірге театрландырылған қойылым мен көңілді ән, бимен жалғасты.
Шырша тойында Алакөл ауданы, Үшарал қаласынан келген Иван Сущев-ский мен Ақсу ауданы, Қапал ауылынан келген Төлеген Жанбота да өздерінің жылы лебізімен бөлісті.
– Президент шыршасына алғаш қатысуым. Маған қатты ұнады. Жаңа жыл мерекесі мен үшін тағы бір жылға қадам басу болып табылады. Бәріңізді Жаңа жылдарыңызбен құттықтаймын, – деді 5-сынып оқушысы Төлеген Жанбота.
Мерекелік шара соңында балалар өздеріне әзірлеген тәттілерден дәм татты.
Сарби ӘЙТЕНОВА
Фото. Жеңіс ЫСҚАБАЙ
