Журналист Бейсен Құранбекті «Жас алаш» газетінің тілшісі болып қызмет атқарып жүрген кезінен сырттай танушы едім. Өзі ұйымдастырып, жүргізген «Айтуға оңай» бағдарламасымен танылған білгір, білімді, сауатты тележурналисті 2012 жылы аталмыш бағдарламаға қатысқанымда жақынырақ тани түстім. Бейсен Құранбекті Жетісу жерінің тумасы, талантымен танылған қайталанбас ірі тұлға деп білемін.
Елордамыз Астанада Елбасының қасында жүріп, сыр-сұхбат алған, кейіннен Алматы облыстық «Жетісу» телеарнасының бас директоры қызметін абыроймен атқарған, үлкенді аға, кішіні іні деп сыйлаған қайырымды, мейірімді азаматтың орны баршамыз үшін тым бөлек. «Айтуға оңай», «Қаракет» бағдарламалары арқылы қилы тағдырлы адамдардың мұңмұқтажын тыңдап, көмек көрсетіп, көптің алғысын арқалады. Бұл көрермен көңілінен шыққан, халықтың есінде мәңгі сақталатын орны бөлек бағдарламалар болды. Бейсеннің осы «Қазақстан» телеарнасынан берілген «Айтуға оңай» бағдарламасына шақыруының арқасында республикаға танылып, ҚР Қорғаныс министрінің «ҚР Қарулы Күштеріне 20 жыл» мерекелік медалін алғанымды қалай ұмытайын?! Жақсы адамның өзгелерге тигізер шарапатына осы- лайша өзім де куә болдым емес пе?
Патриоттық тәрбие тұрғысында әр жылдары ауданда бірінші болып семинар, жиындарды өткізуім Бейсен «Жетісу» телеарнасын бас- қарып тұрған кезінде де ескерусіз қалмады. ҚР Қарулы Күштерінің 25 жылдығына орай Талдықорған қаласындағы «Жетісу» телеарнасының арнайы шақыруымен аудан, облысқа танымал, жетістігі көп әскери шенді оқытушы ретінде тағы бір бағдарламаның қонағы болдым. Телеарнадан шыққаннан кейін бір ғасырдан аса тарихы бар «Жетісу» газетінің бас редакторы Әміре Әрінұлымен кездестім. Бейсен Құранбектің қабылдауында болып, әртүрлі тақырыпта еркін сөйлесіп, естелік суретке түсіп қайтқаным әлі есімде. Міне, осылайша артына із қалдырған қазақ елінің талантты тележурналисі Бейсен Құранбектің 9 желтоқсандағы туған күні алдағы уақытта облыс деңгейінде аталып өтсе деген ұсыныс айтқым келеді. Бейсенді танитындар, бірге қызметтес болғандар осы ойымды қолдайды деп сенемін.
Әсет КӨШЕРБАЙҰЛЫ,
«Білім беру ісінің үздігі», «Ы. Алтынсарин» төсбелгісінің,
«ҚР Қарулы Күштеріне 20 жыл» медалінің иегері
Еңбекшіқазақ ауданы
