Талдықорғанда еліміздің ақпараттық кеңістігінде өшпес із қалдырған тележурналист Бейсен Құранбек атындағы облыстық шығармашылық байқау ұйымдастырылды. Биылғы сайысқа өңірдің әр түкпірінен 96 оқушы қатысып, үш кезең бойынша өз білімдері мен шығармашылық қабілеттерін сынады.
Қазақстан Президенті сыйлығының иегері, Журналистер одағы сыйлығының лауреаты, «Жетісу» телеарнасының директоры, «Айтуға оңай» бағдарламасының жетекшісі әрі жүргізушісі болған Бейсен Құранбек өз заманының нағыз қажымас қайраткері еді. Ол ұлтына жүрегімен қызмет етіп, кәсібіне, халқына адалдығымен танымал болған жан. Артына қалдырған мұрасы зор. Ұлт руханиятына қалдырған мұрасы да мол. Оның есімін ұлықтап, өмірлік ұстанымдарын жас буынға үлгі ету, жастардың шығармашылық ізденісін дамыту және кәсіби көзқарасын қалыптастыру ұйымдастырылған білім додасының негізгі мақсаты.
Ұйымдастырушылардың айтуынша, байқауға қатысамын деген оқушылар саны жыл сайын артып келеді.
– Жыл бойында 500-ге жуық оқушы осы бағытта бағын сынап көрді. Мақсатымыз – бұл байқауды алдағы уақытта республикалық деңгейге шығару. Әр қатысушының артында оны дайындаған білікті мұғалімнің еңбегі бар, – дейді «Жетісу дарыны» оқу-әдістемелік орталығының директоры Сандуғаш Жұмагелдина.
Байқаудың І кезеңінде қатысушылар алдын ала әзірлеген бейнеролик-сюжеттерін ұсынса, ІІ кезең «Жас қаламгер» бағытында эссе жазу тапсырмасымен жалғасты. Қорытынды ІІІ кезеңде оқушылар Бейсен Құранбектің өмірі мен шығармашылығы, сондай-ақ журналистика саласына қатысты блиц-сұрақтарға жауап берді.
Жарысқа қатысушылардың арасында Жаркент өңірінен келген жас талапты оқушылар да бар. Олар талантты журналистің адалдығын, елге қызмет етудегі қайсарлығын өнеге тұтатындарын айтады.
– Жарыс жоғары деңгейде ұйымдастырылған. Біз үшін бұл үлкен тәжірибе алаңы десем болады. Осы сайысқа қатысу арқылы өзімізден кейінгі оқушыларға да үлгі болсақ дейміз, – дейді қатысушы Қазына Нұржұма.
Сайыс қорытындысы бойынша 43 оқушы жүлделі орынға ие болды: І орын – 3 жеңімпаз, ІІ орын – 13, ІІІ орын – 28 оқушы. Сонымен қатар бейнеролик номинациясы бойынша «Креативті көзқарасы үшін» 3 оқушы, эссе бағытында «Ой тереңдігі үшін» 3 қатысушы арнайы марапатталды. Барлық жеткіншекке сертификаттар табысталды.
Бейсен Құранбектің жары Гүлмира Қадырқызы да жас дарындардың дайындығына жылы пікір білдірді:
– Жыл сайын қатысушылардың деңгейі өсіп келеді. Балалардың Бейсекеңнің өмірлік ұстанымдарын бойына сіңіре бастағанын көру – жүрекке қуаныш. Осындай жастар көбейсе еліміз де өсіп, ертеңі жарық болмақ, – деді ол.
«Қарапайым адамның үлкен тарихы» тақырыбында өткен биылғы байқау жасөспірімдердің жаңа қырын ашып, олардың шығармашылық әлеміне тың серпін берді. Бейсен Құранбектің өнегелі жолын дәріптеген игі шара алдағы жылдары да өз жалғасын табатыны анық.
Медет ЖҰМАБАЙ
