Ұзынағаш ауылының шығыс жақ шетін- дегі көпірден өткенімізде: «Тәуелсіздік көшесі осы жерден басталады», – деді жол бас- таушымыз, осы селолық округ әкімшілігінің бас маманы Әлия Әбуова көлігінің жүрісін баяулатып. Тақтайдай тегіс, оқтай түзу әрі кең көшеде адамның тынысы да кеңіп сала бергендей болды.
Бірнеше күннен бері бұлтты, қара суық болып тұрған ауа райы да сол күні жайдарлана қалыпты. Күн шайдай ашық. Жаңа көшенің екі жағына сүйсіне көз тастап, кездескен тұрғындармен тілдеспекке жаймен жылжып келеміз. Көше тыныш. Анда-санда болмаса, көлік қозғалысы аз екен. Бірінші болып ұшырасқан, нөмірі 5-ші үйден шыққан Айнұр Молтаеваны сөзге тарттық. Бұрын Ақтерек ауылында тұрған оның осында қоныс аударғанына жеті жыл болыпты.
– Бұрын бұл маңайда көше де, үй де жоқ болатын. Ауылдың шеті анау саймен бітетін. Ал бүгін адам танымастай өзгерді. Ұзынағаштың іргесі кеңіп, тақыр далада мынандай көше пайда болғанына өзім де таңғаламын. Бұл жерден жер телімін алғандардың бірі мен едім. Алғашқы жылдары біраз қиындық көрдік қой. Жауын-шашында көше балшық болып езіліп кететін. Оған көршілер бірлесіп тас төгіп жататын. Қазір көріп тұрғаныңыздай, көшеміз асфальтталған. Мұның барлығы Тәуелсіздіктің жемісі деп білемін, – деді Айнұр Әзисқызы. Сол арада кездескен жігіт ағасы өзін Тасболат Жиенбаев деп таныстырды. Өзбекстаннан көшіп келіп, осындағы №28 үйде тұрғанына 10 жыл болыпты. Қатарымызға қосылған қандасымыз ашыла сөйлеп:
– Тәуелсіздіктің арқасында атажұртыма, қасиетті Қазақ еліме оралып, өсіп-өніп жатырмын. Келгенде мемлекеттен көмек қаржы алып, қолдау көрдік. Жамбыл ауданындай киелі жерден жайлы орын тапқаныма қуаныштымын. Халқыма ризашылығым шексіз. Жер алып, үй салып алдық. Көршілерім жақсы адамдар. Бір-бірімізбен аралас-құраласпыз. Төрт ұл, бір қыз тәрбиелеп өсіріп отырмыз. Ел қатарлы ұлды ұяға, қызды қияға қондырып жатқан жайымыз бар, – деді. Сондай-ақ көше тұрғындары Ләззәт Әлиева мен Эльмира Болатқызының да пікірлерін біліп, көшенің екінші басына қарай жылжыдық.
Әкімдік маманынан білгеніміздей, көшеге Тәуелсіздік атауы 2011 жылы берілген. Ұзындығы 800 метр ғана. Аула саны 75 үй. Жолай жұмыс істеп тұрған «Жанәли», «Береке» дүкендеріне көз салдық. Көшенің шығыс жағы қиялай бұрылып, Алматы көшесіне жалғасты. Мұнда көркі көз тартар еңселі жаңа ғимарат – «Шынасыл» мешіті орналасқан.
Расында, Ұзынағаш Тәуелсіздік жылдары қатты өсті. Елді мекеннің іргесі кейінгі жылдары қарқынды кеңейіп келеді. Ауыл төрт тарапқа қанат жайып, жаңа шағынаудандар бойкөтерді. Мектеп, балабақшаға сұраныс артуына байланысты әлеуметтік нысандар салынуда.
Бүгінде Ұзынағаштағы халық саны 50 мың адамнан асады. Мұнда көшіп келушілер қатары көп. Иә, елге ел қосылса – құт.
Серік САТЫБАЛДИЕВ
Жамбыл ауданы
