Сарыөзек ауылы ҚР ҚМ 12740 және 29108 әскери бөлімдерінің базасында 2 күндік әскери-патриоттық ойындар өтті. 16-18 жас аралығындағы жастар саптық дайындық, кермеге тартылу, әскери ішкі тәртіпке сәйкес спорттық және сап түзеу, «АК-74» қаруын шашып, жинақтау сынды ойын түрлерінен жарысқа түсті.
Облыстық «Қоғамдық даму басқармасы», «Jetіsý jastary» коммуналдық мемлекеттік мекемесінің филиалы «Kerbulaq jastary» орталығының ұйымдастыруымен өткен шараның мақсаты – жастардың патриоттық сезімдерін шыңдай отырып, әскери қызмет мамандығына деген қызығушылығын оятып, ер-азаматтың Отан алдындағы борышын орындау басты міндеті екенін түсіндіру.
Облыстық шараға 8 аудан, 2 қаладан 10 команда қатысты. Жарысқа қатысушы командалар тартысты ойын көрсетіп, жүлделі орыннан көрінуге тырысып бақты. Жалпы, жарыста 70 жас сарбаз сынға түсті.
Жарыс қорытындысы бойынша Көксу ауданы І орын алып, 500 мың теңге ақшалай сертификатты иеленді. ІІ орынды алған текелілік жастарға 300 мың теңге бұйырса, Кербұлақ ауданының жалынды жастары ІІІ орынды қанағат тұтып, 200 мың теңге ақшалай сертификат және медаль, кубокпен марапатталды. Ескелді және Ақсу ауданының командалары 70 мың теңге ақшалай ынталандыру сыйлығын алды. Қалған қатысушыларға арнайы Алғыс хат табысталды.
А. ЖАҚЫП,
Көксу ауданы әкімінің баспасөз хатшысы
