Жетісуда ауыр атлетикадан ересектер арасындағы Қазақстан Республикасының жеке-командалық чемпионаты салтанатты түрде басталды, деп хабарлайды 7-su.kz ақпараттық порталы.
Дүбірлі доданың салтанатты ашылу рәсіміне Жетісу облысы әкімінің орынбасары Диас Есдәулетов, Қазақстан Республикасы ауыр атлетика федерациясының президенті Гаджи Гаджиев, ауыр атлетикадан ҚР мемлекеттік жаттықтырушысы Асқар Толқынұлы және Жетісу облыстық ауыр атлетика федерациясының президенті Данияр Ескожанов қатысып, спортшыларға сәттілік тіледі.
Еліміздің 16 өңірінен жиналған 160-тан астам саңлақтар ішінде ұлттық құраманың үздіктері де бақ сынауда. Айта кетейік, бұл біріншіліктің жүгі салмақты. Дәл осы жарыстың қорытындысы бойынша 2026 жылғы жазғы Азия ойындарына қатысатын ұлттық құрама жасақталатын болады. Сондай-ақ, еліміздің намысын әлемдік аренада қорғап жүрген спортшыларға Қазақстан Республикасы ауыр атлетика федерациясы атынан 500 000 теңге көлеміндегі ақшалай сыйлықтар табыс етілді.
