Жетісу облысында көктемгі дала жұмыстарына 20 мың бірлік техника тартылады деп жоспарланған, бүгінгі күнге олардың дайындық деңгейі 96%. Жалпы, биыл өңірде ауыл шаруашылығы дақылдарының егіс алқаптарын шамамен 512 мың гектарға жеткізу жоспарланып отыр, — деп хабарлайды Жетісу облысы әкімінің баспасөз қызметі.
Облыстық ауыл шаруашылығы басқармасының мәліметіне қарағанда, қазіргі уақытта 20 370 техниканың 19 458 бірлігі, атап айтқанда трактор, соқа, сепкіш, қопсытқыш, жер тырмасы т.б. жөндеуден өткізіліп, әзірленді. Бұл жұмыстар осы жылдың 15 наурызына қарай толығымен аяқталады.
Егіс науқанына белсенді кірісіп жатқан шаруашылықтардың бірі — Қаратал ауданындағы «ПСК Опытное» ЖСШ. Бұл шаруашылық негізінен егін шаруашылығымен айналысады.
— Биыл 2 мың гектар жерге арпа, сұлы, күріш, жүгері, жоңышқа егуді жоспарлап отырмыз. Арзандатылған жанар-жағармайға өтінім берілді. Көктемгі егістікке қажетті тұқымдар, амоний сульфаты, аммофос, карбамид сияқты тыңайтқыштар алуға дайынбыз. Бізде 30-ға жуық адам жұмыс істейді. Қазір көктемгі егістікке әзірлік жұмыстары жүріп жатыр. Шаруашылықта 30 шақты техникамыз бар. Бұл техникаларды жөндеу, майлау, алқап жұмыстарына дайындаумен механизаторлар мен слесарьлар айналысуда. Өткен жылдары лизингімен 3 жаңа техника сатып алған едік, аталған бағдарламамен осы жылы тағы 4 Lovol тракторын сатып алуды жоспарлап отырмыз, — дейді серіктестіктің бас бригадирі Аслан Төлегенұлы.
Жалпы, өңірде ауыл шаруашылығы техникаларын жаңарту бағытында бірқатар жұмыстар атқарылуда.
— Өткен жылы ауыл шаруашылығы техникаларының жаңартылуы 6,9% болып, 560 бірлік жаңа техника сатып алынса, биыл жаңарған техника үлесін 8% жеткізу, яғни 668 бірлік техника алынады деп межеленіп отыр. Бүгінгі күні «ҚазАгроҚаржы» АҚ ауыл шаруашылығы тауарын өндірушілердің қолжетімді шарттармен жаңа ауыл шаруашылығы техникасын лизингке алуына 15,0 млрд.теңге қаражат бөлді, — дейді облыстық ауыл шаруашылығы басқармасы басшысының орынбасары Бақтияр Шампиков.
Атап өтсек, бұдан бөлек облыста 39 севистік-даярлау орталығы жұмыс істейді. Оларда қант қызылшасы, мал азығы, картоп, күріш, қарақұмық, жүгері бағыттарында 694 бірлік техника бар.
