Оқи отырыңыз
Жесірін қаңғытпаған, жетімін жылатпаған қазақпыз. Бірақ кейінгі уақытта қоғамды дүр сілкіндірген оқиғалар жиілеп кетті. Нәтижесінде қарттар мен жетімдер үйі көбейді. Осындай қоғамдағы келеңсіз жайттарды болдырмау мақсатында «Балалар үйінсіз Жетісу» жобасы жүзеге асуда. Бұл жөнінде ҚР Парламенті Мәжілісінің депутаты Зағипа Балиева мәлім еткен болатын. Аталған жоба аясында «Мемлекеттік қолдауды қажет ететін балаларды отбасына орналастыру» тақырыбында Ескелді ауданының Қарабұлақ орта мектебінде семинар өтті.
Ата-ана махаббатынан шеттетілген жәудіркөздерге мемлекет тарапынан барлық жағдай жасалып жатқанымен маңдайынан сүйіп, еркелетіп, айналып, толғанатын аяулы жанның алақаны жетіспейді. Мұндай теріс әрекеттердің белең алуы ең әуелі отбасындағы тәрбиенің таяздығынан.
Ресми деректерге сүйенер болсақ, елімізде отыз мыңнан астамы жетім балалар бар. Оның 80 пайызы ата-анасының қамқорлығынсыз қалған. Басқосуда облыстық білім басқармасының қамқоршылық және қорғаншылық органы бөлімінің басшысы Әлиям Молотова жоба туралы кеңінен баяндама жасады. Әлиям Максимқызының айтуынша, облыс бойынша жетім және ата-анасының қамқорлығынан айырылған 3 мың бала бар.
– Жыл сайын жетімдер үйі жәудіркөздерге толып келеді. Біздің мақсат – жетімдер үйін азайтып, ондағы тәрбиеленіп жатқан балаларды толық отбасында өсіру. Осы жолда біраз игі істер де атқарылды. Бір қуанарлығы, бала асырап алушылардың саны артып келеді. Мысалы, 2014 жылғы есеп бойынша 328 бала асырап алынса, 2015 жылы 333, 2016 жылы 264 бала ата-ананың аялы алақанын сезінді. Асырап алатын ата-аналар көбіне жаңа туған, әлі есін біле қоймайтын балаларды алғылары келеді. Ал үш жастан жоғарылары ата-ана махаббатын сезінбей, жетімдер үйінде қала береді, – дейді Әлиям Молотова.
Ал патронаттық тәрбие жүйесі облыста 2004 жылдан бастап жүзеге асып келеді. Әсіресе, Еңбекшіқазақ, Қаратал, Іле аудандарының көрсеткіші жоғары. Патронат ата-ана үш балаға дейін тәрбиеленуіне заң жүзінде рұқсат бар. Әрбір балаға мемлекет тарапынан қажетті қаражат бөлінеді. Сонымен қатар, отбасылық жетімдер үйі бар. Мемлекет тарапынан мұндай отбасында тәрбиеленген балаға жылына 824 мың теңге төленеді. Ал мұндай балаларды тәрбиелеп отырған ата-анаға 70 мың теңге айлық беріледі.
Кездесуге келген текелілік Құдыс есімді азамат өзінің алты баласына қоса, тағы екі бала асырап алмақшы екенін айтты. Ол әке-шешенің махаббатына зәру балаларды толық отбасында өсіруді армандағанына екі жыл болған. Осы басқосудан кейін ол барлық құжатты рәсімдеп, жәудіркөздерге отбасылық махаббат сыйлайтын болды.
Жетім және ата-анасының қамқорлығынсыз қалған балаларды отбасына орналастырудың баламалы нысандары бойынша Ескелді ауданы білім бөлімінің бас маманы Шолпан Жақанова тәрбие саласындағы өзекті мәселелер туралы облыстық білім басқармасының тәрбие бөлімінің басшысы Айнагүл Үшкемпірова баяндама жасады. Ескелді ауданының аға прокуроры Самат Олжас аталған жобаны бірауыздан қолдап, осы жолда нәтижелі жұмыс жасайтынын айтты.
Басқосу соңында Қарабұлақ орта мектебінің педагог-психологы Ирина Лебедева «Бақытты отбасындағы бақытты бала» атты практикалық көмекті көпшілікпен бөлісті.
"ЖЕТІСУ-АҚПАРАТ"
Ескелді ауданы
