Оқи отырыңыз
Талдықорғанда үздік журналистерге Алматы облысы әкімінің «Самғау» сыйлығы табысталды. Журналистер арасында өткізілетін байқау биыл бесінші мәрте ұйымдастырылып отыр. Биылғы байқаудың ерекшелігі - жоғары кәсіби шеберлігі үшін тележурналистика қайраткері Бейсен Құранбек атындағы номинацияның қосылуы. Бұл аталымға Алматы облыстық «Жетісу» телеарнасы жаңалықтар бөлімінің бас редакторы Гүлжанат Мақұлжанова лайық деп танылды.
Марапаттау рәсімінде Алматы облысының әкімі Қанат Бозымбаев өңірдің дамуына үлес қосып жүрген журналистер қауымын құттықтап, еңбектеріне табыс тіледі.
- Сіздер, журналистер, қоғамдық өмірдегі маңызы ерекше әрі жауапкершілігі мол кәсіптің иесісіздер. Уақытпен санасуды білмейтін, өзекті мәселелердің, төтенше оқиғалардың бел ортасында жүретін тілшілердің еңбегі әрдайым бағалауға лайық. Тәуелсіз Қазақстанның, соның ішінде Алматы облысының да мерейлі шаралары, өсу кезеңдері бұқаралық ақпарат құралдарында үздіксіз жарық көріп келеді. Объективті байланыс арнасы бола отырып, сіздер халықты ғана емес, облыс басшылығын да ақпараттармен хабардар етіп отырсыздар. Сөйтіп, бізге тұрғындардың өзекті мәселелерін шешуге көмек етіп келесіздер. Сондықтан, журналистерді Жетісу аймағын дамыту жолында әрдайым сенімді әріптес деп санаймын. «Самғау» байқауы - жақсы дәстүр. Дегенмен, келесі жылы конкурсты ұйымдастыруда жаңашылдық енгізіп, сыйлық көлемін ұлғайтуға уәде беремін. Ел Тәуелсіздігінің мерейлі 30 жылдығындағы сіздер үшін бұл марапаттың орны ерекше болады деп ойлаймын, - деді Қанат Бозымбаев. Бұдан әрі марапаттау рәсімі атқарылды.
"Самғау" байқауында "Жетісу" газетінің журналистері де топ жарды. Атап айтқанда, бас редактордың орынбасарлары Нүсіпбай Әбдірахым мен Жұматай Әміреев, веб-редактор Қуаныш Тұнғатар, сондай-ақ, Жұмабай Мұсабеков, Мәулен Әнербай, Аслан Қажеке сынды өңірге есімі белгілі тілшілер жүлдегерлер қатарынан көрінді. Ал газетіміздің беттеуші-дизайнері Сақып Төкеева "Самғау" байқауында бірінші орын иегері атанды.
«Облыс журналистикасы саласына қосқан үлесі үшін» номинациясын «Огни Алатау» газетінің бас редакторы Атсалим Идигов иеленіп, журналистер атынан ризашылық тілегін білдірді.
Бейсен Құранбек атындағы жүлденің иегері, журналистикада 30 жылға жуық еңбек өтілі бар журналист Гүлжанат Мақұлжанова өзінің толқынысты әсерін жасырған жоқ.
- Бейсен Құранбекпен көзі тірісінде әріптес, сыйлас, замандас болдық. Бейсеннің атындағы номинацияның тұңғыш иегері болу - мен үшін бір жағынан қуаныш, екіншіден, үлкен жауапкершілік. Ол бізге әрі басшы әрі тәлімгер болды. Салмақты жобаларды, түрлі фильмдер мен хабарларды бірге жасадық. Оның сенім артқаны мені үнемі алға жетелейтін. «Самғау» байқауына Бейсен Құранбек атындағы номинацияның қосылғаны – бәріміз үшін зор мәртебе, - деді Г.Мақұлжанова.
"ЖЕТІСУ-АҚПАРАТ"
