Оқи отырыңыз
Тәуелсіздігіміз таразы басына түскен осынау алмағайып шақта елдің тұрақтылығы мен бірлігін сақтап, ел экономикасын көтеру мақсатында жасалған Мемлекет басшысының шешімдерін толық қолдаймыз. Егемен көшін ары қарай ғасырларға жетелеу үшін жасалған шараның бірі – дер кезінде Үкіметті жаңадан жасақтау деп білеміз. Президент Қасым-Жомарт Тоқаевтың қатысуымен өткен жиынды көріп, тыңдап шықтым.
Қазақ халқына бір жағадан бас, бір жеңнен қол шығаратын кезең туды. Ел бірлігі мен ынтымағы қашанда басты құндылық. Өйткені, елдің қуат-күшінің артуы, даму даңғылына түсуі ең алдымен тыныштық пен тұрақтылыққа, бірлікке тәуелді.
Мемлекет басшысы бүгінгі жиында экономиканы әртараптандыру, ауылшаруашылығын дамыту, әлеуметтік, қаржылық, сауда-саттық сынды сан сала бойынша кеткен ақауларды реттеп, оның ел игілігіне бағытталуы үшін кешенді бағдарламалар мен өткір шешімдер қабылдады. Бұл тәуелсіздіктің төртінші он жылдығына қадам басқан тұғырлы елдің экономикасы мен әл-ауқатын арттыратын бірегей басталамалар деп түсіндім.
«Қолбасшысы батыр болса, сарбаздары батыл болады», – деген сөз бар дана халықта. Жыл басталғалы бері басымыздан өткен ауыр кезеңде өзінің асқан батырлығымен, көреген қолбасшылығымен қалыпты өмірімізге түсірген Презитент Қасым-Жомарт Тоқаевты тұтас халық болып қолдауымыз керек. Террорлық шабуыл жасалған шақта ел болып тыныштық пен тұрақтылықтың мәні мен мазмұнына толық сана жетелеттік-ау деп ойлаймын. Сондықтан да, бейбітшілікті бесігінде тербетіп, тыныштықты түндігінде нұрдай жайнатқан текті қазақ елінің бұрын-соңды бастан өткермеген кешегі халі енді қайталанбасын деп тілейміз.
Жиында ел Президенті бұл жағдайға сипат беріп, енді тарихта мүлдем қайталанбауына күш салатындығын жеткізді. Мен де бұл ретте ең алдымен азаттықтың алтын шұғыласына шомылып күн кешкеннен асқан бақыт, байлық жоқ екенін жұртыма айтқым келеді.
Қасым-Жомарт Тоқаев сан мың саланың тамырына қан жүгіртер кешенді шаралар қабылдады. Елдің көңіл түпкірінде жатқан сұраққа жиында қадау-қадау қағидаттар бойынша жауап берді. Жаңа жасақталған Үкіметке, Үкімет басшысы болып тағайындалған Әлихан Сымайловқа сәттілік тіледі. Бұл ретте біз де жаңа тарихи кезеңге қадам басқалы отырған Қазақстанның тұрақты, қалыпты өмірге көшіп, қарқынды дамуына тілектестігімізді білдіреміз.
Мемлекет басшысы жиында жастардың әскер қатарына алынып, Отан алдындағы борышын өтеуді мақтаныш көрмейтінін, әскери билет алуға мән бермейтінін айтып, әскери құрылымды күшейту керектігін жеткізді. Біздің заманымызда азаматтарды Отан алдындағы борышын өтеу үшін той жасап шығарып салатын. Той жасалмаған үй ыңғайсызданатын. Осының өзі ойланатын дүние. "Балам сарбаз болды" деп мақтанатын. Біз ұлттық патриотизм, ұлтжандылық сезімдерін әскерге жастарды жіберу арқылы да күшейтуіміз керек. Президенттің бұл бастамасы да құптарлық.
Наурыз ҚЫЛЫШБАЕВ,
Алматы облысының Құрметті азаматы
