Оқи отырыңыз
Ел Президенті Қасым-Жомарт Тоқаевтың «Хабар 24» телеарнасына берген сұхбаты бүгінгі күнде әрбір адамның көкейінде жүрген толғақты мәселелерді қамтуымен өзекті болды.
Онда Мемлемлекет басшысы бұл жағдайға терең мән беріп, дипломатиялық тұрғыда да өзінің білгірлігін танытты. Бейбіт халықтың билікке өз талабын айту үшін шығып, арандап қалғаны, бұл жағдайды елімізге қастық ойлап жүргендердің сәтті пайдаланып кетуі әрбір жанға ой салды деп ойлаймын. Ең басты нәрсе, ел тыныштығы мен бірлігі екенін елімізде орын алған шиеленісті жағдай анық аңғартты.
Осынау сын сағатта Мемлекет басшысы жедел шешім қабылдап, шиеленіс өртінің одан ары тұтанып кетпеуіне ықпал етті. Бейбіт халықты, елімізді, жерімізді лаңкестерден қорғау үшін көрші елдердің көмегіне де жүгінді. Қаскөйлердің жолын тежеу үшін бар жауапкершілікті мойнына алып, оқ ату туралы бұйрық беруіне тура келді. Олай етпеске шара болмады. Лаңкестер қалаларымызды қиратты, дүкендерімізді тонады, қару-жарақтарды ұрлады, көліктерді өртеді, полицейлер мен әскерилерді аяусыз жаншыды. Олардың мақсатты түрде әкімдік және ішкі істер басқармасының ғимараттарын басып алуға тырысқанының өзі нақты жоспармен жұмыс істегендерін көрсетті. Тіпті, оларға аяқтан оқ атқанның өзінде ыңырсынып, адамға тән қорқыныш пен ауырсынуды сезінбегенінің өзі нашақорлар екенін аңғартатындығын сұхбат беру сәтінде атап өтті Президент. Одан түйетін қорытынды, «жау жоқ деме жар астында» деген бабаларымыздың сөзін еске алып, қандай жағдайға да дайын болу. Ол үшін елдің тыныштығын күзетер әскеріміздің даярлығын күшейту аса маңызды. Бұдан кейін халқымыздың тыныштығы мен жайлы өмір сүруіне қажетті шараларды қабылдау – осы кездегі ең өзекті мәселе болып тұр. Мемлекет басшысы бұл ретте де қадау-қадау шешімдер шығаруда. Ендігі кезекте жазықсыз жандардың жапа шекпеуіне мүмкіндік жасап, халықтың тұрмыс-тіршілігін жақсартуға жол ашылса деген өтінішіміз бар. Сонда ғана ел келешегі жарқын болмақ.
Жалпы, өзім қырық бес жылға жуық оқу саласында еңбек етіп келемін. Жастардың пікіріне жиі құлақ асамын. Олардың да ел Президенті Қасым-Жомарт Тоқаевқа деген сенімі зор. Сын сағатта қолға алған істерін де құптап отыр. Ендігі мақсат – ел іргесі тыныш болып, бұдан кейін қаскөйлердің қастығын жүзеге асыруға мүмкіндік туғызбау, елімізді, жерімізді арам пиғылдылардан тазарту, мемлекетіміздің дамуына мүмкіндік жасау. Сонда ғана тәуелсіздігіміз баянды болып, еліміздің гүлденуіне жол ашылады деп білемін.
Мықтыбек РАХЫМБЕК,
Талдықорған заң колледжінің директоры,
Алматы облысының Құрметті азаматы
