Жуырда «Қорғас» шекара маңы халықаралық ынтымақтастық орталығының Қазақстан жағында «Барыс» деп аталатын алғашқы инвестициялық нысанның ашылу салтанаты өткізілді.
Іс-шараға Қытай елінің халық үкіметі мен партиялық жетекшілері, Панфилов ауданы әкімшілігі, «Қорғас» ШЫХО АҚ, «Хоргос-КАТ» ЖШС инвестор компаниясының өкілдері қатысты. Орталықтың ашылу рәсіміне арналған салтанатты жиында «Қазақстан теміржолы» АҚ вице-президенті Қанат Алпысбаев, ҚХР-дың Қорғас қаласы әкімшілігі партия комитетінің хатшысы Ван Ган, «Идин» Шаңхай инвестициялық компаниясының» бас директоры Гэ Цзяньпинь, Қазақстан тарапынан Панфилов ауданы әкімінің орынбасары Шұхрат Құрбанов, «Қорғас» ШЫХО АҚ президенті Василий Ни сөз сөйлеп, шараға қатысушыларды құттықтады.
«Қорғас» шекара маңы халықаралық ынтымақтастық орталығы Қазақстан Республикасы мен Қытай Халық Республикасының шекарасының шектес аймағында орналасқан, қазақ-қытай бірлескен жобасы. Жалпы ауданы 560 гектар жерді қамтиды. Орталық екі бөліктен құралған. Қазақстан жағы – 207 гектар, Қытай жағы – 343 гектарға орналастырылған. Бұл жоба Қазақстан мен Қытай Халық Республикасы арасындағы шекаралық сауда-экономикалық, ғылыми-техникалық, мәдени байланысты дамыту мақсатында ҚР Президенті Н. Назарбаевтың 2002 жылғы 22-25 желтоқсанында Қытай еліне ресми сапары кезіндегі екі мемлекет басшыларының бастамасы бойынша жүзеге асырылып келеді.
Шекараға шектес аймақта әріптестікті дамыту мақсатының басты қағидасы – Қазақстан, Қытай және өзге үшінші мемлекеттердің азаматтарына шекара аумағында 30 тәулікке дейін визаны рәсімдеусіз еркін жүріп-тұруына мүмкіндік жасау.
«Қорғас» шекара маңы халықаралық ынтымақтастық орталығы жобасы бойынша біздің жақта 56 инвестициялық нысан құрылысы жоспарланған, атап айтқанда орталық алаң, қолөнершілер қаласы, конгресс-холл, 4 сауда галереясы, ашық базар, сауықтыру кешені мен 3 сауда үйі. Қазір бұл орталыққа күнделікті 1200-ден 1800-ге дейін, ал демалыс және мейрам күндері 2000-ға дейін адам сауда-саттық жасап келіп-кетеді.
Бүгінде бұл орталық әлемде теңдесі жоқ жаңа жоба. Ол өндірістік, көліктік әлеуетке капитал жұмсауға, шағын және орта бизнесті барынша табысты етуге кеңінен мүмкіндік береді. Біздің инвестициялық саясатымыздың басымдылығын артырып, бәсекеге қабілетті тауарлар мен қызметтерді дамыту және құру, сондай-ақ, олардың әлемдік нарықтағы белсенділігін арттыруға жағдай жасайды.
Болашақ «Қорғас» арнайы экономикалық аймағы кешенді бірнеше бөлімдерден тұратын болады. Мысалы, мұнда үлкен транспорт терминалы, сауда көрмесі, келген адамдар ашық аспан астына шықпай жалғастыра аралайтын сауда павильондары,бір мезетте 5 мың адам қабылдайтын мүмкіндігі бар қонақүй кешені жасалады. Шекаралас мемлекеттердің қаржы және өндірістік ұйымдарының ірі халықаралық кездесулерін, конференцияларын, симпозиумдарын өткізуге арналған орындар салынбақ. Сол сияқты офистер, мейрамханалар, казино, кинотеатр, 70 мың адам қоныстанатын көпқабатты тұрғын үйлер, мектеп, балабақша құрылысын жүргізу жобаланған.
Сөйтіп, еліміздің оңтүстік шығысындағы шекарасы Қорғаста алдағы уақытта инфрақұрылымы өте жоғары деңгейдегі, әлем назарын өзіне аударатын сән-салтанатты қала пайда болмақ. Бұл тек қазақстандықтарға ғана емес, барша Орта Азия және Еуропа елдері үшін шығысқа ашылған үлкен қақпа. Мұндай шекаралар арасындағы экономикалық аймақ әлімнің ешбір елінде әлі жасалған жоқ.
Алаңның ашылу салтанаты аясында «Жаркент әуендері» ансамблі ән шырқап, шараға жиналған шетелдік қонақтарды ұлттық сазбен сусындатты.
Мырзағали Нұрсейіт
Панфилов ауданы.