Оқи отырыңыз
Қазақстан Республикасының әр азаматы елін қорғауға міндетті. Сол себепті де әскерге аттанып, Отан алдындағы борышын өтейді. Ал әскерге дайындық мектептен басталатынын ескерсек, ең әуелі білім ордасындағы оқушыларға көп көңіл бөлу қажет-ақ.
Алғашқы әскери және технологиялық дайындық пәнінің өту барысын көру үшін Талдықорған қаласындағы №28 IT мектеп-лицейіне арнайы бардық. Біз келсек, мұнда пән мұғалімі, толыстағы мойор Айбек Базаралин 10-сынып оқушыларына «Калашников» автоматын жартылай бөлшектеп шашып-жинаудың ретін түсіндіріп жатыр екен. Артынша оқушыларды бастап сыртқа шықты. Мектеп ауласында олар саптық дайындықтарын пысықтап, жалпы әскери қорғаныс жиынтығын киюді меңгерді.
– Оқушылардың әскери салаға қызығушылығы өте жоғары. Осы сабақ арқылы отансүйгіштік, патриоттық рухта тәрбие алды. Отанды қорғауға деген алғашқы қадам осыннан басталады. Бүгін әскери саптық дайындықтарын тағы бір пысықтады. Сапта қалай жүріп-тұру керегін үйренді. Мектеп қабырғасында қаншалықты меңгерсе, кейін аталмыш салаға соншалықты тез бейімделіп кетеді. Биыл оқушылар арасында өткен облыстық «Қайсар» әскери-патриоттық ойындарында шәкірттерім 3-орын алды, – деген Айбек Алыбайұлы сабақтың өту тәсілімен бөлісті.
Оқушылар екі жыл бойы азаматтық қорғаныс, саптық, атыс, тактикалық дайындық, сарбаздардың қорғаныс іс-қимылы, әскери топография, медициналық білім негіздері сынды маңызды бағыттарды барынша меңгереді. Ал болашағын әскери саламен байланыстыратын оқушылар аталмыш сабаққа асығып келетін көрінеді. Солардың бірі 10-сыныпта оқитын Сұлтан Абибулла. Ол Қазақстан Республикасы Әуе қорғаныс күштерінде қызмет еткісі келеді.
– Бұйырса 11-сыныптан кейін Талғат Бигелдинов атындағы Ақтөбе жоғары әскери авиация училищесіне оқуға тапсырамын. Білім ордасында талапкерге қойылған талап жоғары. Сондықтан дайындықты қазірден бастап кеттім. Ұшақ, тікұшаққа деген бала күнгі қызығушылығым күн сайын артып келеді. Ұшқыш ретінде Отанымды аспаннан көру сәтін асыға күтудемін, – деді.
Әскери салаға деген қызығушылығын білдірген Арсен Тұрар келешекте Қазақстан Республикасы Ұлттық қауіпсіздік комитетінде еңбек еткісі келеді. Дәл осындай оқушыларға мектеп қабырғасында жүріп-ақ біраз тәжірибе жинауға барлық мүмкіндік жасалған.
Алғашқы әскери және технологиялық дайындық пәнінің мұғалімі Айбек Базаралиннің айтуынша, оқушылар 14 мамырда Талдықорған гарнизоны №18404 әскери бөліміндегі Ашық есік күніне қатысады. Әскери бөлімде сарбаздардың ант қабылдау рәсімі өтеді. Сонымен қатар, қару-жарақ, техникамен танысып, казармаларды аралайды. Әскери қызметшілердің киім үлігісін тамашалап, олардың тактикалық дайындықтарын көруге мүмкіндік алады.
Даңқты қолбасшы Бауыржан Момышұлы: «Отан үшін отқа түс – күймейсің», – дейді. Дәл осы сөзді жүрекпен сезініп, қай салада болмасын елге адал қызмет етудің негізі, жоғарда айтқанымыздай, мектептен басталады. Сабақ арасындағы қоңыраудың орнына күй ойнайтын мектепте оқушылар қашанда озат болуы тиіс. Отанды оттан да ыстық көретін жас сарбаздарға сәттілік тілейміз!
Мәулен Әнербай
Суреттерді түсірген Руслан Қадіров
