Оқи отырыңыз
Облыс әкімі Бейбіт ИСАБАЕВ «Қарулы Күштерінің ардагерлері» республикалық қоғамдық бірлестігі филиалының төрағасы, отставкадағы 1-ші ранг капитаны Рахым Қырғабақовқа «Құрмет» орденін салтанатты түрде табыс етті.
Еңбегі еленіп, еліміздің әлеуметтік-экономикалық дамуына елеулі үлес қосқан марапат иесіне зор құрмет көрсетілді.
– Президент Қасым-Жомарт Тоқаевтың Жарлығымен мереке қарсаңында бірнеше жетісулық азамат мемлекеттік наградалармен марапатталды. Бұл – үлкен еңбектің жемісі. Қазіргідей әлемде геосаяси жағдайлар ушығып тұрған кезеңде мемлекеттің қауіпсіздігі, қоғамдық тәртіп, ел тыныштығы сияқты ұғымдардың қаншалықты құнды екенін түсіне бастадық. Бұл ретте қорғаныс саласының маңызы бұрынғыдан да арта түсті. Бүгінгі таңда елімізде жүргізіліп жатқан түбегейлі реформалардан қорғаныс саласы да тыс қалған жоқ. Әділеттілік пен адалдық принциптерін негізге ала отырып, жастарды елжандылыққа тәрбиелеуге, жігіттеріміздің бойына тәртіп пен жауапкершілікті, жауынгерлік рухты сіңіруде сіздің сіңірген еңбегіңіз зор. Жауапты қызметті мінсіз атқарып, ел болашағы жолында аянбай тер төгіп жүрген сізді жоғары награда алуыңызбен құттықтаймыз, – деді облыс басшысы Бейбіт Өксікбайұлы.
Офицер «Құрмет» ордені оның басқа наградаларының ішіндегі ең жоғары марапат екенін айтып, облыс әкіміне көрсеткен құрметі үшін алғысын білдірді.
Рақым Қырғабақов 1961 жылы Шұбар ауылында дүниеге келген. 1979 жылы Матай Байысов атындағы орта мектепті бітіргеннен кейін Кеңес одағының Әскери-теңіз күштері қатарына шақырылып, солтүстік флотта сүңгуір қайықта штурман болып 3 жыл қызмет еткен. Бала күнінен офицер болуды армандаған ол 1982 жылы Киев жоғары әскери-теңіз саяси училищесіне оқуға түсіп, 1986 жылы оқуын тәмамдап, Тынық мұхит флотына қосылу үшін Владивостокқа қызметке барады. 1988 жылы Камчатка түбегіне жақын Петропавловск-Камчатский қаласындағы атом сүңгуір қайығына ауысып, оны армияда қызмет етіп жүрген кезінде өзінің бұрынғы командирі, кейіннен вице-адмирал болған І дәрежелі капитан Олег Фалеев қызметке шақырады.
– 1992 жылы Қазақстан Тәуелсіздік алғаннан кейін біз, Әскери-теңіз күштерінде қызметте жүрген 10 офицер, егемен Қазақстан армиясының қатарында қызмет етіп, еліміздің Әскери-теңіз флотын дамытуға атсалысатынымыз туралы бұрынғы Президент Нұрсұлтан Назарбаевқа ашық хат жаздық. Ол кісі біздің ұсынысымызға назар аударып, үлкен қолдау білдірді. Содан 1993 жылы Талдықорған қаласына келіп, әскери байланыс бөлімінде қызмет еттім. Сол жылдың сәуір айында Қазақстан Республикасының Әскери-теңіз күштері құрылды. Ал біз, офицерлер, Ақтау қаласына келіп, еліміздің Қарулы Күштерінің жаңа үлгісін құруды бастап кеттік. Алғашқыда Германиядан кемелер сатып алдық. Кейін Орал қаласынан «Зенит» зауыты кеме шығара бастады. Осылайша, біз еліміздің тарихына еніп, Қазақ Әскери-теңіз күштерінің қалыптасуына зор үлес қостық. Бұл – біздің азаматтық парызымыз. Бүгінгі берілген марапат еңбегім үшін Отанымның айтқан алғысы деп білемін, – деді Рақым Асанбекұлы.
2010 жылы капитан 1-дәрежелі офицер Рақым Асанбекұлы зейнеткерлікке шығып, туған жеріне келеді. Жетісу өңіріндегі «Қарулы Күштер ардагерлері» республикалық қоғамдық бірлестігінің төрағасы болып, жолдастарымен бірге жастардың Отан алдындағы жауапкершілік пен борыш сезімін ояту, елжандылыққа тәрбиелеу, жауынгерлік рухты сіңіру жолында белсенді жұмыс атқаруда.
Еңлік КЕНЕБАЙ
Суретті түсірген Жеңіс ЫСҚАБАЙ
