Оқи отырыңыз
Оқушылар сарайында Жетісу облысындағы барлық деңгейдегі мәслихаттардағы «AMANAT» партиясы депутаттарының I форумы өтті. Жиынды «AMANAT» партиясының Жетісу облыстық филиалының төрағасы Арыстанғали Арын жүргізіп отырды.
– Депутаттар билік пен халық арасындағы нағыз көпір болуға, азаматтардың мүдделерін қорғауға және биылғы наурыз айындағы сайлау науқаны кезінде сайлаушыларға берген уәде мен өзекті мәселелерді шешуге көмектесуге тиіс. Мемлекет басшысының Қазақстан халқына Жолдауы аясында партияның сайлауалды бағдарламасының Жол картасын орындау шеңберінде барлық деңгейдегі мәслихаттардағы партияның депутаттық фракциясының негізгі міндеттерін айқындап, сондай-ақ бейінді мемлекеттік органдармен тығыз байланыс орнатуымыз қажет, – деген Арыстанғали Арын облысымыздағы атқарылып жатқан жұмыстарды баяндады.
Басқосу барысында партия ардагерлері Жомартқали Жексембинов, Оралбек Жақиянов, облыстық ардагерлер кеңесінің төрағасы Ермек Келемсейіт, облыстық мәслихаттағы тұрақты комиссияның төрағасы Секенбай Шеңгелбаев сөз алып, ел аманатын арқалау үлкен жауапкершілік екенін, адал болу керектігін айтып, халық қалаулыларының алдағы ісіне сәттілік тіледі.
Жиында партияның 2023-2027 жылдарға арналған сайлауалды бағдарламасы бойынша атқарылған жұмыстар айтылды. Осы бағдарламаны іске асыру үшін облыстық жол картасы әзірленді. Оған «Өңір тұрғындарының өмірін жақсарту», «Инфрақұрылымға инвестициялау», «Білім беру және денсаулық сақтау болашаққа инвестициялау», «Азаматтардың әлеуметтік санаттарын қолдау» бөлімдерінен тұратын 123 іс-шара енгізілген. Бүгінде 304 сауалдың 90-ы оң шешімін тауып, 83 сауалға заң аясында түсіндірме жұмыстары жүргізіліпті. Биыл 12,5 мың азаматты тұрақты жұмыспен қамту жоспары артығымен орындалған. 10 айдың қорытындысы бойынша 21,1 мың адам тұрақты жұмысқа тартылған.
Мемлекет басшысының тапсырмасын іске асыру мақсатында биыл жылдық сыйақы мөлшерлемесі 2,5%-дан аспайтын 35 жасқа дейінгі жастарға арналған жеңілдетілген шағын несие беру бағдарламасы іске қосылды. Осы мақсатқа облыс бойынша 268 адам 5 млн. теңгеге дейінгі көлемде шағын несие алып, 300-ден астам жұмыс орны ашылды. «Ауыл аманаты» жобасы бойынша облыста 3,2 млрд. теңге бөлінген. Бүгінде 3 млрд. 939 млн. теңгеге 646 өтінім қабылданып, оның 489 өтінімі мақұлданып, 379 өтінімге несие берілді. Сондай-ақ, «Қарызсыз қоғам» жобасы, «Өңірлік әйелдер қанаты», «Ұлағатты ұстаз», «Кітап-AMANAT», «Жер Аманаты» жобалары бойынша атқарылған жұмыстар мен алдағы жоспарлар кеңінен талқыланды.
Осыдан кейін Бейсен Құранбек атындағы Журналистер үйінде, Жастарға қызмет көрсету орталығында жиын өтіп, білім, құрылыс, әлеуметтік қорғау, спорт, жолдар, ЖКХ, цифрлік технологиялар, денсаулық сақтау, қоғамдық даму, экономика, ауылшаруашылығы, жер қатынастары, кәсіпкерлік, полиция, мәдениет саласындағы істелген жұмыстар мен өзекті мәселелер қозғалып, оны шешу жолдары айтылды.
"Жетісу-Ақпарат"
