Оқи отырыңыз
Шетелдіктерге Қазақстанда еңбек етуге рұқсат алу үшін не істеу керек? Бұл туралы Халыққа қызмет көрсету орталығының мамандары айтып береді.
Ол үшін шетел азаматтары ең алдымен өзі уақытша тіркелген ХҚО-ға кезекті алдын ала брондап, белгіленген уақыттан 20 минутқа ерте келуі керек. Операторға келесі құжаттарды тапсыру арқылы еңбек етуге рұқсат алуы тиіс:
Егер бірінші рет рұқсат алып тұрған болса, өтініш пен рұқсат бергені туралы қабылдаушы жақтың сауалнамасы, қызмет ақысы төленгені туралы түбіртек, жеке басты куәландыратын құжат, саусақ іздері мен суретке түсу процесінен өткені туралы құжаттың түпнұсқасы, медициналық сақтандыру құжаты, 086 үлгісіндегі медициналық анықтама өткізеді.
Егер бұрын рұқсат алынған болса, саусақ іздері құжаты мен медициналық анықтаманы ұсыну керек емес. Бірақ қабылдаушы тараптың типтік келісімшарты қажет болады.
Қызмет кұны: 1 айға – 2 АЕК (5 556 тг), 2 айға – 4 АЕК (11 112 тг), 3 айға – 6 АЕК (16 668 тг). Қызмет көрсету уақыты құжат тапсырған күнді есепке алмағанда - 1 жұмыс күні.
Есіңізде болсын! Қазақстанға келе сала қабылдаушы жақ шетелдіктің келгені туралы 3 күн ішінде көші-қон полициясына ескерту жасауы керек. Ескерту болмаған жағдайда ХҚО құжат қабылдамайды. Шетелдік азамат ХҚО-ға қабылдаушы жақпен бірге баруы керек. Қызмет ақысын төлеу үшін шетел азаматының ЖСН-і болуы керек. Ол болмаған жағдайда, оны да ХҚО арқылы алдын ала рәсімдейді.
ХҚО арқылы тек Әзірбайжан, Тәжікстан, Өзбекстан мемлекеттерінің азаматтары ғана құжат тапсыра алады. Қазақстанға келгендігі туралы ақпарат түскен соң, Әзірбайжан мен Өзбекстан азаматтары рұқсатты 30 күн ішінде, Тәжікстан азаматтары 90 күн ішінде рәсімдеулері қажет.
"ЖЕТІСУ-АҚПАРАТ"
Сурет - ғаламтордан
