Оқи отырыңыз
Өңірлердің әлеуметтік-экономикалық дамуы және мемлекеттік бағдарламалардың іске асырылуы бойынша Көкше төрінде өткен келелі кеңесте Елбасы Нұрсұлтан Назарбаев әкімдердің алдына бірқатар мәселелерді қойған болатын. Осыған орай әкімдікте арнайы жиын өтіп, облыс әкімі Амандық Баталов облыстық басқармалар мен департаменттердің басшыларына, аудан, қала әкімдеріне бірнеше тапсырма берді.
– Биылғы жылдың өткен 7 айының әлеуметтік-экономикалық даму қорытындысы шығарылды. Біздің алдымызда бірнеше маңызды тапсырма тұр. Мемлекеттік «Нұрлы жер» және «Нұрлы жол» бағдарламаларының орындалуы Елбасының ерекше бақылауында. Сол себепті, осы және өзге де бағыттар бойынша жұмыстарды қарқынды жүргізу қажет. Мемлекеттік-жекеменшік әріптестік механизмдерін қолдану мәселесіндегі, соның ішінде денсаулық сақтау саласында осы механизмді қолдануда белсенді жұмыстар жүргізуіміз керек.Өңірге инвестиция тарту да ерекше назарда. Сондықтан да, аудан, қала әкімдері мен басқарма және департамент басшыларына осы аталған тапсырмаларды орындауда үлкен жауапкершілік танытуын сұраймын. Аталған бағыттардың орындалуы әрбіріңіздің атқарған жұмыстарыңыздың айқын көрсеткіші болып табылады, – деді облыс басшысы.
Жиын барысында облыс әкімі «Рухани жаңғыру» бағдарламасын орындауға ерекше назар аудару қажеттігін де атап өтті.
Амандық Ғаббасұлы облыстық ішкі саясат басқармасының басшысы мен осы салаға жетекшілік ететін орынбасарына:
– Облыста «Рухани жаңғыру» бағдарламасын іске асыру бағытында қолға алынған жұмыстарды жандандыру қажет. Бізде көп мүмкіншіліктер бар, алайда белсенділік таныту жағы ақсап тұр. Істеліп жатқан жұмыстарыңызда нақтылық байқалмайды. Жаңаша көзқараспен қарап, тиісті шаралар қабылдаңыздар, – дей келе «Рухани жаңғыру» бағдарламасын жүзеге асыру мақсатында арнайы ашылған Талдықорған қаласындағы облыстық жобалық кеңсе жұмысын қайта қарап шығуды тапсырды.
Жалпы облысымызда «Рухани жаңғыру» бағдарламасы бойынша 108 жоба жасалып, жүзеге асуда. Оның ішінде «Туған жер», «Атамекен» бағыты бойынша 21 жобаны іске асыру көзделіп отыр. Оның ең ірісі Еңбекшіқазақ, Кербұлақ аудандарында жүзеге аспақ. Елбасының үндеуін қолдаған осы ауданның кәсіпкерлері өз бастамаларымен мәдениет және демалыс саябақтарын қоршап, қосымша білім беру орталықтарын ашуды, компьютерлік сауаттылық, ағылшын тілі бойынша жастардың білімін арттыруды көздеп отыр. Сонымен қатар үлкен бір жоба Қарасай ауданында жүзеге асып, қыркүйек айының басында «Батыр бабалар» атты музей-кешені ашылмақ. Жыл соңына дейін жүзеге асатын 21 жобаға кететін қаражат 2 млрд. теңгені құрап отыр.
Қолға алынатын тағы бір жоба – Талхиз, Қойлық сынды көне қалалар мен Бесшатыр қорымына археологиялық қазбалар жүргізіп, аспанасты музейіне айналдыру. Бұл бойынша бүгінде құжаттандыру жұмыстары жүргізілуде.
«Рухани жаңғыру» бағдарламасы бойынша жұмыстарды саралаған облыс басшысы әлі де жобаларды жетілдіру, балалар үшін жаңа дүниелер ойлап тауып, аулаларды халықтың санасының жаңғыруына әсер ететіндей қазақы үлгіде сәндеу сынды өзгеше ізденістің қажеттігін атап өтті. Аудан әкімдеріне де осы іске айрықша мән беруді тапсырды. Аталмыш бағдарлама бойынша қаражат көлемі келер жылы 1 млрд. теңгеге ұлғайтылатынын да жеткізді.
Алма ЕСЕНБАЕВА.
