«Таза Қазақстан» акциясының «Жасыл апталық» шарасы аясында облыстық дін істері басқармасы мен «Отбасы банк» Жетісу облыстық филиалының қызметкерлері 200 түп ағаш егіп, өнегелі істері арқылы өзгелерге үлгі көрсетті. Шараға 20-дан астам мешіт имамы мен 30-ға жуық банк қызметкері қатысты.
Балапанов және Бәйкен Әшімов көшесінің қиылысына егілген жас өскіндер біраз жылда жүргіншілердің саялайтын жеріне айналатыны анық.
– Қаламыздың өсіп-өнуі, көгеріп-көктеуіне облыстағы мешіт имам-ұстаздары атсалысуда. Ауа адамсыз өмір сүре алады, адам ауасыз өмір сүре алмайды. Таза ауа қашанда бәрімізге керек. Осындай мақсатпен игілікті істі қолға алдық. Бүгін Талдықорған қаласындағы 9 мешіттің имамдары мен ұстаздары қатысып отырмыз. Бұл жұмыс бұған дейін де атқарылып келеді. Мешіттердің айналасын абаттандыру ісін үнемі қадағалап отырамыз. Былтыр 4064 көшет отырғызғанбыз. Бәрі көктеп, көгеріп тұр. Биыл 5 мың түпке жуық көшет отырғызу жоспарымызда бар, – дейді облыстың бас имамы Керімбек Дәуітов.
Жалпы, табиғатты қорғау – барлығымызға ортақ іс. «Бір жылдығын ойлаған адам егін ексін, он жылдығын ойлаған адам көшет отырғызсын, жүз жылдығын ойлаған адам ұрпақ тәрбиелесін» деген аталы сөз бар. Осынау ата-баба қағидасын берік ұстанған дін өкілдері аймағымыздың көріктенуіне осылай үлес қосып келеді. Шараға қатысқан банк қызметкерлері де осындай ойда екендігін білдірді.
Қажет АНДАС
Суретті түсірген Руслан ҚАДЫРОВ