Оқи отырыңыз
Қолданыстағы заңнама талаптарына сәйкес аң аулау мерзімінің аяқталғанына байланысты Балқаш ауданы полиция бөлімінің басшылығы түсіндіру жұмыстарын жүргізіп, саятшылыққа құмар жандарға үндеу жасады. Бұл туралы "Жетісу" газеті хабарлады.
Өз сөзінде Балқаш ауданының тәртіп сақшысы рұқсат етілмеген мерзімде аң және балық аулау қылмыстық және әкімшілік жауапкершілікке әкелетінін ескертті.
«ҚР Үкіметінің 2012 жылғы 2 шілдедегі № 901 қаулысымен аң аулау туралы ереже бекітілген. Еліміздің аумағында тұяқты жануарларды, яғни, шошқа, елік аулау мерзімі қыркүйек айының бірінші сенбісінен басталып, 31 желтоқсанда аяқталды», - деп Балқаш АПБ бастығының міндетін атқарушы, полиция подполковнигі Дәурен Құтпанов аңшылық жасау мерзімін айқындап берді.
Полиция ақпараты бойынша, 2020 жылы Балқаш ауданының аумағында жануарлар дүниесін заңсыз пайдалануға қатысты 14 қылмыстық іс қозғалған. Оның 7 дерегі балық ресурстарын заңсыз аулау және 7 дерегі заңсыз аңшылық жасағаны үшін қозғалған. Сондай-ақ, табиғат қорғау полициясы былтыр қоршаған ортаны қорғау, табиғи ресурстарды пайдалануға қатысты 99 әкімшілік құқықбұзушылықты әшкерелеген. Еліміздегі заң талаптарын бұзған адамдар жауапкершілікке тартылып, 530 мың теңгеге жуық әкімшілік айыппұл төлеген.
«Құрметті Балқаш ауданының тұрғындары мен қонақтары! Табиғи байлығымыздың өсіп-өнуіне жағдай жасау мақсатында заңмен тыйым салынған кезде аңшылық жасамауға және балық ауламауға шақырамын. Заңсыз әрекет қатаң жазаланатыны белгілі! Сонымен қатар, тіршілік иелеріне қиянат жасауға болмайтынын ұмытпаңыздар!» - деп толықтырды полиция подполковнигі Дәурен Құтпанов.
"ЖЕТІСУ-АҚПАРАТ"
