Оқи отырыңыз
Облыстық «Jetіsý» газетінің тұрақты оқырманы болғасын әр шыққан санын қолыма алып, жарық көрген мақалаларды түгелдей оқып шығам. Сондай сәттің бірінде 13 сәуір, №144 санында Айдар Қалиевтің «Көлік тізгіндеген көкөрім тыйым салынатын заң бар ма?» деген мақаласына көзім түсті.
Онда бүгінгі күннің өзекті мәселесінің бірі – жасөспірімдердің екі дөңгелекті көлік жүргізуі жайлы баяндапты. Иә, журналист маңызды тақырыпты көтерген. Бүгінде мопед мінген жастар да, жасамыс та көбейіп кеткені жасырын емес. Мақалада олардың қауіпсіздігі, заң талабына сай ережені сақтауына қатты алаңдайды. Мұны мен де құп көрдім. Ата-ана болғасын біз де балаларымыздың қауіпсіздігіне алаңдайтынымыз белгілі. Тек маған бір мәселе түсініксіз болып тұр. Аталған мақалада «Егер кәмелетке толмаған бала ереже бұзса, ата-анасына айыппұл салынады» – дейді. Заңдылығында ата-анасына салыну керек. Мен мұнымен келісемін.
Түсінікті болу үшін анықтап жазайын. Менің ұлым жуырда мопед мініп, МАИ қызметкерлерінің қолына түскен. Кәмелетке толмаған баланы ұстаған құқық қорғау қызметкерлері заң талабы бойынша көлігін айып тұрағына қойып, балама айыппұл салған. Тағы да қайталап жазайын, ата-анасына емес, кәмелетке толмаған баламның атына айып салған. Сонда қалай? Газетте балаға емес, ата-анаға салынады деп жауап береді де, іс жүзінде келгенде кәмелетке толмаған балаға айыппұл сала береді. Бұл жерде кім өтірікші? Газет пе, МАИ ма?
Мен баламды жақтап тұрғаным жоқ. Заң бұзды, жауапқа тартылу керек. Құқық саласының қызметкерлері заңды неге өздері бұзады?! Ата-анасына салатын айыппұлды балама салған. Балаға психалогиялық соққы жасап тұр. Иә, сол күні бір пәлені бүлдіріп келгенін сездік. Ұлым мазасызданып, әкесінен қорқып, дегбірі қашып кетті. Мұны білген біз баламыздан болған жайтты айтып беруді талап еттік. Бүгінгі жастардың психалогиясы өте төмен. Бір пәлеге ұрынып қалмасын деп, ақылмен айтып, салынған 36920 теңгені төлеп, мопедті алып келдік.
Жас балаға неге мопед әпересіздер деп бізді жазғыруларыңыз мүмкін. Шындығында мопедті әкесі өзіне алған еді. Бала болғасын қызықпай тұра ма? Әкесі үйде жоқ кезде пайдаланған. Содан барып, құқық қорғау саласының қызметкерлері жауапқа тартқан. Осы орайда мен газет арқылы құқық қорғау саласының қызметкерлерінен болған жайтқа байланысты түсінік берулерін сұраймын. Заңды белшесінен басты ма, жоқ әлде құқық саласының мамандары заңды білмей ме? Егер полиция қызметкері заңға қайшы іс-әрекет жасаған болса заң талаптарына сай жауапқа тартылсын. Ал заңды білмейтін болса, жұмыстан шыққаны дұрыс шығар деп ойлаймын. Өйткені заңды білмеген маман жазықсыз жанның обалына қалып, полицияның имиджіне кір келтіреді деп есептеймін.
Назым Тоқтарбекова,
ата-ана, газет оқырманы
Талдықорған қаласы
