Оқи отырыңыз
Жыл сайын оқырманның олжасына айналған ғажайып шығармалар «Бір ел – бір кітап» акциясы аясында кеңінен насихатталады. Биыл алты Алаштың маңдайына біткен қос алып туралы жазылған «Ұстаздың оралуы» мен «Абай жолы» романдары аталмыш акцияның арқауына айналды. Осыған орай С.Сейфуллин атындағы Алматы облыстық әмбебап кітапханасында жергілікті зиялы қауым өкілдерінің қатысуымен «дөңгелек үстел» өтті.
Рухани шараның шымылдығын аталмыш кітапхана директоры Ғалия Тоқабаева құттықтау сөзімен ашты.
– Әлемнің екінші ұстазы саналған ұлы бабамыз әл-Фарабидің 1150 және хакім Абайдың 175 жылдық мерейтойы биыл аталып өтпек. Осыған орай заманымыздың заңғар жазушылары Ә.Әлімжанов пен М.Әуезовтың қаламынан туған ғажайып шығармалар акцияға арқау болып отыр, – дей келе, дәстүрлі түрде ұйымдастырылып келе жатқан акцияның мақсатына тоқталды. Сонымен қатар, акцияға орай өткен жылы ұйымдастырылған ел көлеміндегі байқауда облыстық кітапхананың бас жүлдені иеленгенін, биыл да сол шыққан биіктен төмендемеу керектігін атап өтті.
Өз кезегінде Халықаралық «Алаш» әдеби сыйлығының лауреаты, Бүкіләлемдік Шыңғысхан академиясының академигі, ҚР Жазушылар Одағы басқармасының Алматы облыстық филиалының директоры, облыстық «Жетісу» газетінің бас редакторы Әміре Әрін сөз алды.
– Әл-Фараби мен Абай зеңгірден салбырап түсе қалған жоқ. Олардың бойындағы қасиет ұлы түркі халықтарының кеудесіндегі асыл қазыналардың жалғасы деп ұғуымыз қажет. Елбасының «Тарих толқынында» кітабында: «Біздің даңқты бабаларымыз мыңдаған жылдар бойына мынау Еуразия кеңістігінде өркениеттің интеграторы болды», - деп жазады. Расында біздің айбарлы да білімді ұлы бабаларымыздың алдында бәрі басын иді. Өйткені, біз өркениетті тараттық, – деген ақын сол өркениет таратқан елден ұлы ойшылдардың шығуы заңдылық екенін атап өтті. Сонымен қатар, тауанды тарихтан көптеген мысал келтіре отырып, қос алыптың асыл болмысын, тұлға-тұрпатын көркем баяндаған ақын даңқты бабалардың бай мұрасын биліктен бастап қарапайым халыққа дейін зейінмен оқып, ойшылдардың философиялық толғамдарын іске асыру керектігін, сонда ғана Рухани жаңғырған ел болатынымызды қадап айтты.
Абайдың «Масғұт» поэмасын антикалық әдебиеттегі шығармалармен салыстыра отырып, данышпанның білім көкжиегінің кең екенін, хакімдік биікке көтерілуіне ұшан-теңіз білім мен парасаты, ұлы қабілеті алып шыққанын атап өткен І.Жансүгіров атындағы Жетісу мемлекеттік университетінің профессоры Мұратбек Иманғазинов қос алыптың беймәлім қырларынан сыр тарқатты. Өз кезегінде философия ғылымдарының докторы, профессор Аманжол Қасабеков, филология ғылымдарының докторы Сайлау Қожағұлов сынды ғалымдар қос алыптың шығармасын зерттеу әлі де бір ізге түспегенін, ұлы ойшылдардың мәңгілік мұрасы күллі адамзат баласына ортақ қазына екендігін атап өтті.
Жиын барысында Абай атындағы №1 орта мектептің оқушылары хакім жырларын оқыса, облыстық Сүйінбай атындағы филармония әншісі Айбол Құдайбергенов пен Қ.Байсейітов атындағы саз колледжінің студенттері ұлы ақынның әндерін тамылжыта шырқап, көпшілік ықыласына бөленді.
Асыл СҰЛТАНҒАЗЫ
Алматы облысы
