Облыстық полиция департаментінің киберқылмысқа қарсы іс-қимыл басқармасы Қазақстан Республикасы Ішкі істер министрлігінің киберқылмысқа қарсы іс-қимыл департаментімен және «Жаңа адамдар» жастар қозғалысымен бірлесіп жүргізген жедел іс-шаралар нәтижесінде порнографиялық сипаттағы материалдарды заңсыз таратумен айналысқан күдіктіні анықтады.
Полицейлердің мәліметінше, күдікті Алакөл ауданының 22 жастағы тұрғыны. Тергеу барысында оның TikTok әлеуметтік желісі арқылы кәмелетке толмаған қызбен танысып, кейін мессенджер арқылы байланысын жалғастырғаны белгілі болды. Ол жәбірленушінің сеніміне кіріп, психологиялық қысым көрсетіп, қорқытып, алдап, интимдік сипаттағы фото және бейнематериалдарды алған.
Кейін аталған материалдарды мессенджердегі жабық арналар арқылы заңсыз таратып, одан пайда көрген. Қазір күдікті уақытша ұстау изоляторына қамалды. Сотқа дейінгі тергеу жалғасуда. Сонымен қатар оның осыған ұқсас өзге де қылмыстарға қатысы бар-жоғы тексеріліп жатыр.
Бұл оқиғаға байланысты полиция ата-аналарды балалардың интернеттегі қауіпсіздігіне ерекше көңіл бөлуге шақырады. Кәмелетке толмағандарға әлеуметтік желілерде қауіпсіз қарым-қатынас жасау ережелерін түсіндіріп, бейтаныс адамдарға жеке фотосуреттері мен бейнематериалдарын жібермеудің маңызын үнемі ескертіп отыру қажет. Егер интернет арқылы бопсалау, қорқыту, ақша талап ету немесе жеке деректерді заңсыз тарату фактілеріне тап болсаңыз, дереу полицияға хабарласқан жөн. Уақытылы берілген ақпарат құқықбұзушыларды жедел анықтап, мұндай қылмыстардың алдын алуға мүмкіндік береді.
Өңір тәртіп сақшылары аталған қылмысты әшкерелеуге қолдау көрсеткен «Жаңа адамдар» жастар қозғалысының өкілдеріне алғыс білдірді.
Дастанбек САДЫҚ
