Волейболдан 10 дүркін ел чемпионы «Жетісу» командасы биыл да үздік нәтиже көрсетіп, мықтылар тізіміне кіргісі келеді. Жазғы ауыс-түйіс барысында команда құрамы айтарлықтай өзгеріп, жаңа ойыншылар қатарға қосылды. Келгендер тізімінде ресейлік шабуылшы Ольга Зверева бар. Олямен сұхбаттасудың сәті түсті.
– «Жетісу» волейбол кулбы жөнінде келмей тұрып не білдің және қазір күтеніңдегідей болып жатыр ма?
– Қазақстандағы ең титулды команда екенін о баста білдім. Кейінгі турнирлердегі нәтижесі өте жоғары. Алғашқы жаттығуымды өткіздім. Барлығы мен күткендегідей жақсы болды. Жаттығу барысы, одан тыс қарым-қатынас, ойыншыларға жасалған жағдай бәрі көңілімнен шықты. Тіпті мен ойлағаннан асып түсті.
– Командадағы ойыншылардан алғаш болып кіммен таныстың, не жөнінде әңгімелестіңдер?
– Жолдан келген бетте бірінші болып командамыздың либеросы Мадина Бекетті көрдім. Ол мені жылы қарсы алып, екеуміз біраз әңгімелестік. Ал ертеңінде командамен болған жиында барлық қыздармен таныстым. Командадан керемет атмосфера сезіледі. Бәрі бауырмал. Маған қатты ұнады.
– Талдықорған қаласы ұнап жатыр ма, қай жерлерге бардың, есіңде ерекше қалғаны?
– Шағын, тыныш қала. Орналасқаныма көп болмағандықтан, әлі толық аралап үлгерген жоқпын. Терезеден тауларды, әсем ғимараттарды, тамаша табиғатты көрдім. Алдағы күндері жаттығумен ойынның арасынан уақыт тауып, міндетті түрде барынша аралап, жақын танысқым келеді.
– Қазақ асханасынан дәм таттың ба?
– Әлі дәм татпадым, бірақ ғаламтор арқылы қарап, таныстым. Бұл елде етті ерекше жасайды. Сондықтанда бешбармақтың дәмін көргім келеді. Бұл тізімде бауырсақ та бар. Түртіп алғаным өте көп. Бәрінің дәмін көрсем деймін.
– Жаңа маусымнан не күтесің?
– Тартысты әрі қызықты ойындарды күтемін. Чемпионатта оңай қарсылас болмайды, сондықтанда барынша дайындалып, жақсы нәтиже көрсеткіміз келеді. Сол үшін тырысамыз. Дәл қазіргі міндет – алаңда бір-бірімізді түсініп, жұмыла отырып жұмыс істеу.
– «Жетісу» волейбол клубының жанкүйерлеріне не айтасың?
– Командаға қосылғаныма қуаныштымын. Мен үшін бұл клубтың намысын қорғау үлкен мақтаныш. Бізді қызыққа толы маусым күтіп тұр деп ойлаймын. Барша жанкүйерлерден қолдау күтеміз. Әр қолдау – маңызды.
– Сұхбатыңызға рақмет!
Серік ҚАНТАЙ
