Бүгінде облыста 625 кәсіпорын жұмыс істейді. Биылға арналған жоспар – өнеркәсіп өнімінің көлемін 460 млрд. теңгеге жеткізу. Өңір кәсіпорындарында 23 мыңнан астам адам еңбек етеді. Соңғы үш жылда өндіріс көлемін арттыруға бағытталған ірі жобалар жүйелі түрде жүзеге асырылуда.
Талдықорған қалалық кәсіпкерлік бөлімінің басшысы Батыржан Жексембінің айтуынша, 2023-2025 жылдары жалпы құны 100 млрд. теңгені құрайтын 29 жаңа бизнес орны ашылып, 7 кәсіпорынның өндірістік қуаты кеңейтілген.
Аймақтағы өнеркәсіптің қарқынды дамуын Талдықорған қаласында жүзеге асырылып жатқан бірқатар жобадан анық көруге болады. Солардың бірі – «IPM Group» ЖШС. Кәсіпорын арнайы жұмыс киімдері мен жеке қорғаныс құралдарын өндіреді. Өткен жылы жаңа тігін өндірісін іске қосқан компания өнеркәсіп, құрылыс, мұнай-газ, энергетика және төтенше жағдайлар қызметкерлеріне арналған арнайы киімдерді шығарып келеді. Бұл жоба аймақтағы жеңіл өнеркәсіптің дамуына тың серпін берді. Серіктестік басшысы Сергей Турванов қаладағы колледждермен бірігіп, кәсіптерін жандандырып жатқанын айтады. Бүгінде мұнда 25 адам жұмыспен қамтылған. Егер тапсырыс көбейсе өндірісті кеңейтетіндерін жеткізді.
Тағы бір маңызды өндіріс – «Стальбетон» ЖШС. Индустриялық аймақта орналасқан зауытта автоклавты газбетон блоктары өндіріледі. Серіктестіктің ауысым жетекшісі Жомарт Дәулет- ұлы құрылысқа қолданылатын газбетон блоктарын облыстың барлық ауданы алып жатқанын айтады. Жылына 150 мың текшеметр құрылыс материалын шығаратын кәсіпорынның іске қосылуына 2,5 млрд. теңге инвестиция құйылып, 60 жаңа жұмыс орны құрылды. Бүгінде мұнда өндірілетін өнім тұрғын үй мен әлеуметтік нысандар құрылысында кеңінен қолданылып, құрылыс саласын жергілікті өніммен қамтамасыз етуге мүмкіндік беріп отыр.
Облыста тағам өнеркәсібі де даму үстінде. Осы саладағы кәсіпорындардың бірі – «Дәмді» кондитерлік фабрикасы. Фабриканың негізі 2019 жылы қаланған. Бес адаммен жұмысын бастаған кәсіпорын 37 адамға еңбекақы төлеуде. «Дәмді» бүгінде тұрғындарға түрлі кондитерлік өнім ұсынып, жергілікті нарықты сапалы өніммен қамтып келеді. Мұнда тағамның сапасы мен қауіпсіздігіне ерекше мән берілуде. Кондитерлік фабриканың жетекшісі Ләззат Сайдахметова басында сатушы болып жұмыс істеген. Содан осы тәттілерді неге өзіміз шығармасқа деген ой туған. Сөйтіп ең өтімді деген печеньелерді өздері пісіріп, сата бастайды. Жаңа дайындалған тәттілер көптің сұранысына ие болды. Нәтижесінде өз өнімдерін саудалау үшін адам көп баратын жерден дүкен ашады. Олардың тауары облыстың жер-жерлеріне жіберіледі. 23 түрлі өнім шығарады.
Осындай кәсіпорындардың дамуы облыста өндіріс құрылымының әртараптануына, жаңа жұмыс орындарының ашылуына және жергілікті өнім көлемінің артуына ықпал етуде. Бұл өз кезегінде өңір экономикасының тұрақты дамуына негіз қалайды.
Гүлжан ТҰРСЫН
