Жаңа Конституция білім беру жүйесіне тек құқықтық тұрғыдан ғана емес, қоғамдық құндылықтар тұрғысынан да жаңа талаптар жүктейді. Құжатта адамның құқықтары мен бостандықтарын жоғары құндылық ретінде тануды әрбір азаматтың сапалы білім алуға тең мүмкіндігін қамтамасыз етуді мемлекеттің басты міндеттерінің біріне айналдырды. Бұл қағидат білім беру саласында қолжетімділік, әділдік, инклюзивтілік және білім сапасын арттыру бағытындағы жұмыстардың негізгі бағдары.
Конституцияда бекітілген заң үстемдігі қағидаты білім беру ұйымдарында қауіпсіз әрі құқықтық мәдениеті жоғары орта қалыптастыруға негіз болады. Оқушылардың құқықтарын қорғау, кемсітушілікке жол бермеу, инклюзивті білім беруді дамыту және ерекше білім беру қажеттілігі бар балалар үшін тең жағдай жасау – білім саясатының ажырамас бөлігі. Бұл – Конституцияда айқындалған теңдік пен әлеуметтік әділеттілік қағидаттарының нақты көрінісі. Сонымен қатар жаңа Конституция азаматтың қоғам алдындағы жауапкершілігін күшейтетін құндылықтарды алға шығарады. Осыған сәйкес білім беру жүйесінде құқықтық сауаттылықты арттыруға, азаматтық ұстанымды қалыптастыруға, отансүйгіштікке, еңбекқорлыққа және қоғамдық жауапкершілікке тәрбиелеуге басымдық берілуде. Мемлекет басшысы айқындаған «Заң мен тәртіп», «Еңбексүйгіштік пен өрлеу», «Тазалық пен табиғатты аялау» қағидаттары тәрбие жұмысының мазмұнына жүйелі енгізіліп, жас ұрпақтың бойында адалдық, әділдік және елге қызмет ету сияқты қасиеттерді қалыптастыруға бағытталған.
Осылайша, жаңа Конституция – білім беру саласының дамуына құқықтық негіз ғана емес, стратегиялық бағыт-бағдар беретін маңызды құжатқа айналды.
Оның қағидаттарын іс жүзінде жүзеге асыру – сапалы білімге қолжетімділікті кеңейтуге, кәсіби әрі бәсекеге қабілетті педагогтерді қолдауға және елдің болашағын қалыптастыратын білімді, жауапты, отаншыл ұрпақ тәрбиелеуге мүмкіндік береді.
Гүлзира Мешітбаева,
М. Мәметова мектебінің мұғалімі
Ескелді ауданы
