Америкалық зерттеушілер Күн жүйесінен тыс аймақта орналасқан, атмосферасы мен тасты беті бар ерекше экзопланетаны анықтады. Маңызды ғарыш жаңалығы ретінде тіркелген LHS 1140 b жүйесіндегі Жерге ұқсас планета ғаламдағы тіршілік белгілерін іздеуде үлкен серпіліс саналады, – деп хабарлайды 7-su.kz ақпараттық порталы.
LHS 1140 b аспан денесі біздің ортақ үйімізден 48 жарық жылы қашықтықта орналасқан. Ол Күнге қарағанда шағын әрі салқындау келетін қзыл ергежейлі жұлдызды айнала қозғалады. Астрономдардың айтуынша, аталған нысан өмір сүруге оңтайлы, яғни су сұйық күйінде сақталатын «Златовласк аймағында» орын тепкен.
Гарвард университетінің докторы Колин Керубим ашылған жаңалықтың заманауи астрофизика үшін маңызы өте жоғары екенін айтады. Себебі бұрын-соңды дәл осындай қолайлы аймақтағы тасты ғаламшарда газдық қабат тіркелмеген еді.
Қазіргі таңда ғалымдар ғаламшардың жоғарғы атмосфералық қабатынан гелий газын тапты. Осы инертті гелийдің өзінде тірі организмдердің дамуы мүмкін емес. Дегенмен, жоғарғы қабатта гелийдің болуы төменгі қабаттарда тіршілікке қажетті өзге газдардың сақталу ықтималдығын арттырады.
Адамзат баласын ежелден «Ғаламда біз жалғызбыз ба?» деген іргелі сауал мазалайтыны жасырын емес. Гарвард университетінің докторы Дэвид Шарбононың пікірінше, қатты беті мен газ қабаты бар жаңа нысанның табылуы осы жұмбақты шешуге жасалған алғашқы сенімді қадамдардың бірі.
Қазіргі таңда ғылымда 6000-нан астам экзопланета белгілі. Алайда, олардың арасында қатты беті мен сақталған атмосферасы қатар келетін аспан денелері саусақпен санарлық.
Бұған дейін K2-18b немесе TRAPPIST-1 жүйесіндегі ғаламшарлар ғалымдарға үлкен үміт сыйлаған болатын. Алайда, кейінгі технологиялық тексерулер ол жерлерде тіршілік ортасының қалыптасуы неғайбыл екенін көрсетті. Ал LHS 1140 b ашылуы заманауи телескоптар мен ғарыштық бақылау әдістерінің жаңа деңгейге көтерілгенін дәлелдейді.
Ғарышты игерудегі мұндай оң өзгерістер ғылыми зерттеулердің дұрыс бағытта келе жатқанын аңғартады. Алдағы уақытта «Джеймс Уэбб» секілді қуатты телескоптар арқылы LHS 1140 b атмосферасының төменгі қабатын егжей-тегжейлі зерделеу жоспарланған. Бұл азаматтардың ғылымға, астрономияға деген қызығушылығын арттырып, жас мамандардың жаңа ашылулар жасауына жол ашады.
