Үкімет Жетісу облысындағы Алакөл көлінің жағалауын шайылудан қорғау үшін қорғаныс бөгетін салуға 3 млрд теңге бөлді, – деп хабарлайды 7-su.kz ақпараттық порталы.
Тиісті қаулыға Премьер-министр Олжас Бектенов қол қойды. Қаржы Үкіметтің резервінен қарастырылып, Мемлекет басшысының су шаруашылығы инфрақұрылымын дамыту тапсырмасы аясында бағытталып отыр.
Жоба аясында жалпы ұзындығы 6 шақырым болатын қорғаныс бөгетін салу көзделген. Инженерлік құрылыс аумағы келесідей бөлінген:
-
Көктұма ауылы: 2,5 шақырым қорғаныс бөгеті;
-
Ақши ауылы: 3,5 шақырым жағаны нығайту аумағы.
Өткен 2025 жылы 1,7 шақырым аумақта жағалауды нығайту жұмыстары жүргізіліп, жер қазу, бетон құю мен габион құрылымдарын орнату аяқталды. Қазіргі таңда құрылыс-монтаж жұмыстарының 25 пайызға жуығы орындалып үлгерді.
Мамандардың есептеуінше, жоба Алакөл жағалауының одан әрі шайылуын тоқтатып, көлдегі шөгінділердің табиғи қозғалысын және қайта бөліну процесін сақтауға мүмкіндік береді.
Алакөл – Жетісудың басты туристік аймағы. Жағалау сызығының табиғи себептерге байланысты шайылуы жергілікті инфрақұрылымға, демалыс орындары мен жақын орналасқан ауылдарға үлкен қауіп төндіріп келген еді. Тосқауылдар орнату арқылы табиғи тепе-теңдік сақталып, туризм саласына жаңа серпін беріледі.
Қорғаныс инфрақұрылымының салынуы өңірдің туристік әлеуетін арттырады. Сонымен қатар жазғы демалыс маусымында келетін 50-60 мыңнан астам турист пен жергілікті тұрғындар үшін қауіпсіз әрі қолайлы орта қалыптасады. Соңғы екі жылда еліміздің Ақмола, Ақтөбе, Батыс Қазақстан, Қостанай, Солтүстік Қазақстан мен Павлодар облыстарында жалпы ұзындығы 240-243 шақырым болатын қорғаныс бөгеттері мен гидротехникалық құрылыстар бой көтерді.
Үкімет су және туристік инфрақұрылымды дамытуға, табиғи ресурстарды қорғауға әрі өңірлердің тұрақты әлеуметтік-экономикалық дамуын қамтамасыз етуге бағытталған жобаларды тұрақты бақылауда ұстап отыр.
