Жетісу облысында құрылыс саласы жыл сайын дамып, тұрғындарды сапалы баспанамен қамту және әлеуметтік нысандарды көбейту бағытында ауқымды жұмыстар атқарылуда, – деп хабарлайды 7-su.kz ақпараттық порталы Жетісу облысы әкімінің баспасөз қызметіне сілтеме жасап.
Қазіргі таңда өңірде 90 нысанның құрылысы жүргізіліп жатыр, соның ішінде 64 нысанды жыл соңына дейін пайдалануға тапсыру көзделген. Олардың қатарында 7 білім беру нысаны, 12 денсаулық сақтау нысаны, 6 мәдениет мекемесі мен 3 спорт нысаны бар. Талдықорған қаласында өткен Құрылысшылар күніне арналған салтанатты жиында өңірдің инфрақұрылымын жақсарту жұмыстарына жан-жақты тоқталып, сала мамандары марапатталды. Мерекелік шарада облыс әкімінің бірінші орынбасары Әлібек Жақанбаев құрылысшылардың ерен еңбегін атап өтіп, әлеуметтік нысандар мен тұрғын үй салуға бөлінген қаржы көлемі өткен жылмен салыстырғанда 8%-ға артқанын жеткізді.
Жыл соңына дейін он көппәтерлі тұрғын үйдің құрылысы толық аяқталып, нәтижесінде 3309 пәтер пайдалануға берілмек. Аталған баспаналардың ішінде 1574 пәтер әлеуметтік осал санаттағы азаматтарға кезектілік тәртібімен табысталады. Өңірде тіркелген 43 құрылыс компаниясы заманауи талаптарға сай сапалы нысандар тұрғызып, халықтың әл-ауқатын арттыруға елеулі үлес қосып келеді. Мамандардың айтуынша, қалалар мен аудандардың архитектуралық келбеті жаңарып, тұрғындар үшін қолайлы орта қалыптасуда. Салтанатты жиында көп жылдық адал еңбегі үшін саланың 50-ге жуық үздік қызметкеріне Құрмет грамоталары, Алғыс хаттар және «Құрметті құрылысшы» төсбелгілері табысталды.
– Саламыздың өркендеуіне үлес қосып жүрген барлық әріптестерді кәсіби мерекемен құттықтаймын. Құрылысшы мамандығы жоғары жауапкершілікті талап етеді. Заманауи технологиялар мен сапалы материалдарды қолданып, Талдықорған қаласы мен басқа да елді мекендердің көрнекті инфрақұрылымын жасап жатырмыз, – деді «Нұр-Шапағат-Құрылыс» компаниясының өкілі Қайрат Кереев.
