Бастөбе ауылдық округіне қарасты Күрішдаласы ауылында орналасқан №55078 әскери бөлімінің сарбаздары, сержанттары және рота командирлері бүгін №162 сайлау учаскесіне келіп, Құрылтай сайлауына белсенді қатысты.
Ел қорғаны болуды абыройлы міндеті санайтын, әскери антына адал азаматтар мемлекетіміздің жарқын болашағы үшін өз таңдауын жасауға уақыт бөліп, азаматтық белсенділіктерін танытты.
Біркелкі әскери киім үлгісіндегі сарбаздар мен офицерлердің сайлауға қатысуы жас ұрпаққа үлгі болып, көпшілік тарапынан жылы ықыласқа ие болды. Үлкен буын өкілдері Отан қорғаушыларға ақ батасын беріп, ел болашағына бейжай қарамай, азаматтық борышын абыроймен атқарып жүргені үшін алғыстарын білдірді.
Ел тыныштығы мен қауіпсіздігін қамтамасыз етіп жүрген әскери қызметшілердің сайлау үдерісіне белсенді қатысуы – олардың мемлекет алдындағы жауапкершілігі мен ел болашағына деген зор сенімінің айқын көрінісі.
