Заң үстемдік құрған жерде тәртіп орнығып, елдің еңсесі тіктеледі. Ал өз құқығын білген азамат қай кезде де әділеттің ақ жолынан жаңылмайды. Осыны мақсат еткен «Заң мен Тәртіп» қағидаты аясында Талдықорғандағы орталық «Арбатта» «Құқықтық дәріхана» атты шара өтті.
Атауының өзі айтып тұрғандай, бұл басқосудың мән-маңызы терең. Мұнда тұрғындар күнделікті өмірде кезігетін құқықтық мәселелерін ортаға салып, сала мамандарынан тікелей кеңес алды. Басты мақсат – қала жұртының құқықтық сауатын арттырып, заңды мүддесін қорғаудың жолын көрсету.
Қоғамдық бастаманы облыстық ішкі саясат басқармасы ұйымдастырды. Ашық алаңға облыс әкімінің орынбасары Марлен Көлбаев, Жетісу облысының прокуроры Бауыржан Жұмақанов бастаған құқық қорғау саласының өкілдері жиналды. Прокуратура, полиция, қорғаушылар, нотариустар, сот орындаушылары мен жеке сот орындаушылары тұрғындардың сауалына жауап берді.
Шараның мән-маңызына тоқталған Марлен Қапашұлы мұндай кездесулердің азаматтардың заңды құқығы мен мүддесін білуіне айрықша мүмкіндік беретінін атап өтті. Ал Жетісу облысының прокуроры құқықтық кеңес алуға келген кез келген азаматтың сауалы назардан тыс қалмайтынын жеткізді.
– Облыстық прокуратураның бастамасымен күллі құқық қорғау органдары, қорғаушылар, нотариустар, сот орындаушылары, жеке сот орындаушылары жұмылып, жиынға бір адамдай атсалысуда. Мұнда кез келген азамат толғандырған сауалына нақты жауап алады. Себебі әр адам өзінің конституциялық құқығын білуге міндетті, – деді Бауыржан Альбертұлы.
«Құқықтық дәріханаға» келгендер көкейдегі сауалдарын бүкпесіз жеткізді. Солардың бірі – қала тұрғыны Дария Дауталиева шағынаудандардағы абаттандыру жұмыстарына қатысты мәселе көтерді. Тұрғынның айтуынша, кейбір аулалар мен жаяу жүргіншілер жолы әбден тозған. Үйлердің қасбеттері де жаңартуды қажет етеді.
– «Жетісу» шағынауданының 9-үйінен бастап Ломоносов мектебіне дейінгі жолдар тозып кеткен. Назарбаев даңғылындағы тұрғындар тұратын бөлікті де абаттандыру қажет. Ол жерге жаттығу алаңын жасауға болады. Бұл маңда студент көп тұрады, – дейді Дария Дауталиева.
Бір қарағанда, бұл – тұрмысқа қатысты қарапайым мәселе көрінгенімен оның астарында қала кеңістігін жайлы ету, тұрғындардың қауіпсіз жүріп-тұруына жағдай жасау, ортақ ортаны күтіп ұстау тәрізді маңызды түйіндер жатыр. Осындай талап-тілектің тиісті мамандарға тікелей жолдануы да шараның негізгі артықшылығының бірі.
Халық пен билік арасындағы ашық әңгіме осындай алаңдарда айқын көрініс табады. Азамат өз мәселесін айтып қана қоймай, оның шешілу тетігін де мамандардан біледі. Ал жауапты органдар тұрғындардың күнделікті тіршілігіне қатысты түйткілдерді тікелей естіп, назарға алады.
Санжар СҰЛТАНҒАЗЫ
