Жетісу облысында Алматы, Тараз қалалары мен облыс өңірлерінен келген шығармашылық ұжымдар мен өнерпаздардың қатысуымен «Бірлік пен келісім» фестивалі өтті, – деп хабарлайды 7-su.kz ақпараттық порталы.
Өңірімізде этносаралық татулықты нығайту мен мәдени әртүрлілікті насихаттау бағытында кешенді жұмыстар тұрақты жүргізіледі. Осындай маңызды бастамалар қоғамдық тұрақтылықты қамтамасыз етіп, өңірдің әлеуметтік-мәдени дамуына серпін береді. Жетісу жерінде ұйымдастырылған ауқымды іс-шара Қазақстан халқының бай мәдени мұрасы мен достық қарым-қатынасын тағы бір мәрте айшықтады.
Ауқымды фестиваль аясында Қазақстанда тұратын түрі этностардың салт-дәстүрі мен өнері көпшілік назарына ұсынылды. Шараға жиналған көрермендер халық әндері мен билерін тамашалап, әсерлі фольклорлық және хореографиялық қойылымдарға куә болды. Оған қоса, ұлттық ойындар мен салт-дәстүрге негізделген арнайы бағдарлама фестивальдің мазмұнын тереңдете түсті.
Сахна төрінде қазақ, орыс, татар, украин және Кавказ халықтарының билері мен әндері шырқалып, көрерменге ерекше көңіл-күй сыйлады. Жас домбырашылар күй тартып, ұлттық өнердің құдіретін паш етті. Шығармашылық кеште сахна ардагерлері мен жас таланттар бірге өнер көрсетіп, сабақтастық дәстүрін көрсетті. Бұл бастама жастарды отаншылдыққа, өзге мәдениетті құрметтеуге баулудың тиімді құралы болып саналады.
Концерт соңында барлық қатысушылар сахнаға бірге шығып, ортақ композицияны орындады. Түрлі этнос өкілдерінің басын біріктірген бұл сәт елдегі бейбітшілік пен ынтымақтастықтың нақты көрінісіндей әсер қалдырды. Сапалы ұйымдастырылған мәдени шаралар өңірдегі қоғамдық келісімді нығайтып, мәдени туризмнің дамуына оң ықпал етеді.
Жетісу облысындағы этносаралық татулық, бейбітшілік пен достық – біздің басты байлығымыз. Осындай маңызды мәдени жобалар алдағы уақытта да өз жалғасын табады.
