Жетісу облысының орталығындағы қоғамдық қауіпсіздікті қамтамасыз ететін 5514 әскери бөліміне Ұлттық ұланның Бас қолбасшысы, генерал-лейтенант Аңсаған Балтабеков арнайы барды, – деп хабарлайды 7-su.kz ақпараттық порталы turkystan.kz сайтына сілтеме жасап.
Сапар барысында Бас қолбасшы алдымен жаңадан салынатын әскери қалашықтың жобасымен танысып, оның жүзеге асырылу барысына қатысты мәліметтерді тыңдады.
Бұдан кейін Аңсаған Балтабеков әскери бөлімнің 1 және 2-батальондары мен 3-жедел мақсаттағы ротасының жұмысын аралап көрді. Ол жеке құрамның жауынгерлік қызметін ұйымдастыруға және әскери қызметшілердің күнделікті тұрмысына назар аударды.
5514 әскери бөлімінің сарбаздары Талдықорған қаласының қоғамдық қауіпсіздігін қамтамасыз ету мақсатында күн сайын көшелерде жауынгерлік қызмет атқарады. Бұл бағыт әскери қызметшілерден жоғары дайындықты, қырағылықты және жауапкершілікті талап етеді.
Тексеру кезінде Бас қолбасшы әскери қызметшілердің тұрғын үй-жайларын, асханаларды, оқу және дайындық сыныптарын аралады. Сондай-ақ әскери техникаларға арналған автопарктің жағдайымен танысты.
Сапар бағдарламасына әскери бөлімнің кинология бөлімшесі мен «Бүркіт» арнайы жасағы да кірді. Мұнда арнайы бөлімше жауынгерлерінің жауынгерлік даярлығы, қызметтік иттерді үйрету барысы және жеке құрамның кәсіби шеберлігі көрсетілді.
Әскери қызметшілер Бас қолбасшыға күнделікті қызметі мен жауынгерлік міндеттерді орындау барысы туралы баяндады.
Бөлімнің тыныс-тіршілігімен танысқан Ұлттық ұланның Бас қолбасшысы әскери қызметшілерге қызмет өткеруге қолайлы жағдай жасаудың маңыздылығын атап өтті. Бөлім басшылығына жеке құрамның тұрмыстық және қызметтік жағдайын одан әрі жақсартуға бағытталған бірқатар тапсырма берілді.
