Елімізде ұлттық мақтанышымыз бен дала өркениетінің нышаны саналатын қазақы тазының ресми мерекесі алғаш рет тойланып жатыр, – деп хабарлайды 7-su.kz ақпараттық порталы.
Бұл атаулы дата 2024 жылғы 3 қыркүйекте Амстердам қаласында Халықаралық кинологиялық федерацияның (FCI) қазақ тазысын алдын ала тану туралы тарихи шешіміне орай белгіленді. Осы айтулы оқиғадан кейін асыл тұқымға № 372 халықаралық стандарт бекітіліп, Қазақстан оның шыққан елі ретінде тіркелді.
Ұлттық мұраны жаһанға таныту бағытындағы жұмыстар қарқынды жүріп жатыр. Маңызды қадамдардың бірі ретінде мына оқиғаларды атап өтуге болады:
-
2025 жылы Хельсинкиде өткен Дүниежүзілік иттер көрмесінде қазақ тазысының ресми таныстырылымы ұйымдастырылды.
-
2026 жылғы маусымда Болоньяда (Италия) өткен World Dog Show көрмесінде Қазақстаннан барған 12 тазы ел намысын биік деңгейде қорғап қайтты.
Мемлекет басшысы Қасым-Жомарт Тоқаев 2022 жылы ұлттық тұқымды сақтау мен дамыту бойынша нақты тапсырмалар жүктеді. Нәтижесінде 2023 жылы арнайы заңнамалық негіз қалыптасты. ҚР Экология және табиғи ресурстар министрі Ерлан Нысанбаев бұл жеңістердің артында үлкен еңбек жатқанын алға тартты. Оның айтуынша, басты мақсат – тазының генетикалық қорын сақтап, табиғи қабілеттерін келешек ұрпаққа жеткізу.
